Hindistan terep pakistan hökümitining Uyghurlar uchrawatqan zulumgha köz yumghanliqini tenqid qildi

Muxbirimiz irade
2017-09-12
Élxet
Pikir
Share
Print

Hindistan xewerler torida élan qilin'ghan bir parche maqalida pakistan hökümitining Uyghur mesilisidiki pozitsiyesi tenqid qilindi.

Düshenbe küni hindistan xewerler torida "Mutexessisler, pakistanning musulmanlarni qollashtiki saxtipezlikige so'al qoydi" serlewhilik bir parche maqale élan qilin'ghan idi.

Maqalide, pütün dunya jama'etchiliki birdek bérma hökümitining rohingga musulmanlirigha qiliwatqan zulumini qattiq eyiblewatqan bir peytte, pakistanning musulmanlarni qollash mesiliside saxtipezlik qilip, 'qosh ölchem' qolliniwatqanliqi tenqid qilindi.

Maqalida asim sajad axtar isimlik bir aptorning sözi neqil keltürülüp mundaq déyilgen: "Pakistan hökümiti bir tereptin öz tewelikidiki baluchistanliqlargha qarita qoralliq heriket élip bérip, ularni basturuwatqan bolsa, yene bir tereptin özining 'himalayadinmu égiz, déngizdinmu chongqur' dostluq rishtisi bolghan xitayning pakistan'gha chégradash Uyghur aptonom rayonidiki Uyghur musulmanlirigha yürgüzüwatqan zulumini körmeske sélip keldi."

Maqalida yene mundaq déyilgen: "Rohinggalar asiya qit'eside dölet térroluqigha uchrawatqan birdin-bir xelq emes... Uyghur musulmanlirimu xitay hökümitining shundaqla xitaydiki mutleq köp sanni igileydighan xitay nopusining ziyankeshlikige uchrimaqta."

Maqalida yene Uyghurlarning mejburiy assimilyatsiye qilishqa uchrawatqanliqi, ana tilini sözlesh, milliy we diniy alahidilikini namayan qilidighan kiyim-kécheklirini kiyishining chekliniwatqanliqi tilgha élin'ghan. Axirida, pakistan hökümitini jiddiy mesililerge qarita 'qosh ölchem' ni emes, belki adalet ölchimini asas qilishqa chaqirghan.

Toluq bet