Pakistanning “Iqtisadiy karidor” qurulushi qerzini qayturalishi gumanliq iken

Muxbirimiz jüme
2017.12.02
Share on WhatsApp
Share on WhatsApp

Pakistanning “Xitay pakistan iqtisadiy karidori” qurulushi üchün alghan qerzlerni tölesh iqtidarigha so'al qoyulushqa bashlighan.

Pakistanda chiqidighan “Éksprés tribyun” namliq gézitning xewer qilishiche, bu qarashlar yéqinda amérikaning washin'gton shtatigha jaylashqan döletlik asiya tetqiqat idarisi namliq tetqiqat jem'iyiti élan qilghan bir doklatta otturigha qoyulghan.

Xewerde körsitishiche, 50 milyard dollar meblegh sélin'ghan bu karidur qurulushning 60 pirsenttin köpreki kömür qalaydighan ot éliktur istansisi qurulushini teshkil qilidiken.

Pakistanda tok yétishmeslik mesilisi intayin éghir bolup, “Karidur qurulushi” pakistanning köprek tok ishlepchiqirishigha yardem qilidighan bolsimu, emma u pakistandiki énérgiye krizisini tüptin hel qilalmaydiken. 

Xewerde doklatning aptori wilson merkizidiki yuqiri derijilik jenubiy asiya tetqiqatchi maykél kugélmanning éytqanliridin neqil élip körsitishiche, u, karidur qurulushi élip kélidighan menpe'etlerge ümidwar qarimaydighanliqini bildürgen. 

U mundaq dégen: “‛xitay-pakistan iqtisadiy karidori‚ qurulushi pakistandiki qerz, chiriklik, éniq we mas qedemlik énérgiye siyasitini bolmasliq qatarliq krizislarning négizlik menbesini hel qilishqa alahide tesir körsitelmeydu.”

Atalmish “Xitay-pakistan iqtisadiy karidori” qurulushi 2013-yili bashlan'ghan. Nöwette mezkur pilan boyiche bashlan'ghan 16 qurulush türi tamamlinish aldida turghan bolup, islam'abad hökümiti 2018-yilidiki saylamdin burun bularni püttürüshke bekrek aldirimaqta iken. 

Emma xewerde körsitishiche, pakistanning bu qurulush üchün alghan qerzi mesilisi yenila oylinish telep qilidighan mesile iken. 

Xewerde mundaq körsitilgen: “Emma pakistanning alghan qerzlerni qayturush iqtidari we bu yéngi énérgiye salghan mebleghlirini pul bilen teminlesh iqtidarigha qoyulghan riyal so'allar izchil qattiq bolmaqta.”

Ilgiri bu heqte élan qilin'ghan bezi xewerlerde mezkur karidur qurulushining pakistanning milliy igiliki we yerlik iqtisadigha yoshurun xewp tughduridighanliqi körsitilgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.