Пакистанниң “иқтисадий каридор” қурулушиға һазир әмәслики мәлум

Мухбиримиз җүмә
2017.11.18
Share on WhatsApp
Share on WhatsApp

Пакистан һөкүмитиниң “хитай-пакистан иқтисадий каридори” қурулушиға йетәрлик һазирлиқ көрмигәнлики, қисқиси буниңға тәйяр әмәслики илгири сүрүлмәктә.

Бүгүнки пакистан гезитиниң хәвәр қилишичә, юқири қарашларни пакистанда көзгә көрүнгән иқтисадшунас вә һөкүмәтниң ички ишлиридин хәвәр шәхс, дәп қарилидиған кайсәр бенгали оттуриға қойған. 

У, “хитай-пакистан иқтисадий каридори” қурулушиниң мумкинчилик доклатиға соал қойған вә мәзкур қурулушқа кетидиған чиқим доклатиниң пакистан тәрипидин тәйярланғанлиқини билдүргән. 

Хәвәрдә нәқил қилишичә, у мундақ дегән: “чиқим вә пайда анализи һазирланмиди. Мәзкур қурулушниң екологийилик тәсири баһалап чиқилмиди.” 

У өзиниң мәзкур қурулушқа қариши әмәсликини билдүргән болсиму, һөкүмәтниң буниңға йетәрлик һазирлиқ көрмигәнликни әйиблигән. 

У мундақ дегән: “‛биз хитай-пакистан иқтисадий‚ каридори қурулушиға мувапиқ һазирлиқ көрмидуқ. Һәтта һөкүмәтниң иқтидарсизлиқи сәвәблик келишим шәртлирини қаттиқ талишалмидуқ.”

У йәнә қәшқәрдин гвадар портиға тутишидиған бу каридор рәсмий ишқа кириштүрүлсә хитайдин импорт қилинидиған мәһсулатларниң йәрлик игиликкә еғир зиян салидиғанлиқи, һәтта уларни вәйран қиливетиши мумкинликини оттуриға қойған. 

Илгирики хәвәрләрдиму, 50 милярд долларға йеқин мәбләғ селинған бу қурулушниң пакистанға әмәс, бәлки хитайғила мәнпәәт елип келидиғанлиқи, район екологийәси, шундақла мәзкур каридур өтидиған районлардики йәрлик хәлқләрниң кишилик һоқуқлириға еғир бузғунчилиқ салидиғанлиқи көрситилгән иди.

Бу һәптә елан қилинған бәзи хәвәрләрдә пакистан һөкүмитиниң мәбләғ тәминләштики йетәрсизлики сәвәблик “хитай-пакистан иқтисадий каридори” ниң бир қисим түрлиридә қурулуш қиливатқан хитай ширкәтлириниң қурулуш тохтитишқа мәҗбур болғанлиқи көрситилгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт