Maya wang: "Pakistan Uyghurlardin bashqa hemme musulmanlargha köngül bölidu"

Muxbirimiz irade
2019-04-18
Élxet
Pikir
Share
Print

Bügün xelq'ara kishilik hoquqni közitish teshkilatining tetqiqatchisi maya wang "Xewer heptiliki" zhurnilida bir parche maqale élan qilip, pakistan bash ministiri imran xanning Uyghur musulmanlirigha qiliwatqan ikki yüzlimichilikini tenqid qildi.

"Pakistan yéqin shériki xitay zulum qiliwatqanlardin bashqa hemme musulmanlargha köngül bölidu" dégen kinayilik mawzu qoyulghan bu maqale del imran xanning kéler hepte xitaygha qilidighan resmiy ziyariti bashlinish aldida élan qilin'ghan.

Maya wangning körsitishiche, imran xan pakistanda bir öktichi siyasetchi mezgilidila dunyaning herqaysi jayliridiki musulmanlarning hoquqi üchün aktip awaz chiqirip kelgen bir shexis iken. U 2017-yili b d t bash katipigha mektup yollap, xelq'ara jem'iyetni rohin'ga musulmanlirini qoghdash üchün yéterlik küch chiqarmidi, dep qattiq tenqid qilghan bolsa, téxi yéqinda yéngi zélandiyediki meschitte yüz bergen qoralliq hujumdin kéyin tiwittérda élan qilghan yazmisida "11-Séntebir weqesi" din kéyin 1 yérim milyardqa yéqin musulmanlarning térrorchilar bilen oxshash bir tayaqta heydelgenlikidin shikayet qilghan.

Maya wang maqaliside imran xanning musulmanlarning hoquqini qoghdashta nahayiti aktip biri bolghanliqi sewebidin uning xitay hökümitining zulumigha uchrawatqan Uyghur musulmanlirigha kelgende "Méning bu ishtin xewirim yoq" dep olturuwélishining alahide diqqet tartidighanliqini eskertken.

Imran xan bu yil 3-ayda "Maliye waqti géziti" ning ziyaritini qobul qilghanda muxbirning Uyghurlarning lagérgha qamiliwatqanliqi heqqidiki so'algha "Men bu heqte köp nerse bilmeymen" dep jawab bergen idi.

Maya wang maqaliside pakistanning hazir xitayning "Bir belwagh bir yol" qurulushidiki eng muhim dölet ikenliki we hindistanning öz térritoriyesi ichidiki qoralliq guruppilargha qarshi heriket qozghishining aldini élishta xitaygha éhtiyaji barliqi nuqtisidin imran xanning bu mesilini körmeske séliwélishini qismen chüshinishke bolidighanliqini tilgha alghan. Emma u pakistanning b d t diki wekillirining kishilik hoquq kéngishide xitay üchün yaqa yirtip, "Xitay hökümiti musulman puqralirining halidin obdan xewer éliwatidu" dep jar sélishini chüshinishning heqiqetenmu qéyinliqini bildürgen.

Toluq bet