Pakistan tekshürüsh ömiki Uyghur élide ramizanning cheklen'genlikige a'it ispat tapalmighanliqini bildürgen

Muxbirimiz jüme
2016-07-03
Share


Pakistan diniy ishlar ministirliqi teshkillep Uyghur élige ewetken diniy tekshürüsh ömiki jüme küni bayanat élan qilip, Uyghur élide tekshürüsh jeryanida ramizanning cheklen'genlikige a'it ispat tapalmighanliqini bildürgen.

Pakistan kündilik xewerler gézitning 2 - iyul xewer qilishiche, mezkur 4 kishilik tekshürüsh ömikige pakistan diniy ishlar ministirliki islamiy tetqiqat ishlar bash diréktori nurul islam shah yétekchilik qilghan bolup, bularning ichide islam'abadtiki faysal meschitining bash xatipi misbahur raxman we mupti abdul islam we qari muhemmed shah qatarliq diniy zatlar bar iken.

Bu yilmu xitayning Uyghur élide ramizanliq cheklimilerni kücheytkenliki, oqutquchi - oqughuchilar, hökümet xadimliri, partiye ezalirining roza turushni chekligenliki, Uyghur ashxanilirini ramizan mezgilide échishqa mejburlighanliqi, meschitlerde tarawi namazlirini nazaret qilghanliqi delil - ispatliq xewer qilin'ghan idi.

Ereb birleshme xelipilikidin chiqidighan "Bügünki boghuz" gézitidiki xewerlerge qarighanda, pakistanning yuqiri derijilik diniy erbablardin terkib tapqan tekshürüsh ömiki xitayning teklipi bilen Uyghur élide 26 - iyundin 28 - iyun'ghiche tekshürüshte bolghan.

Xewerde körsitishiche, bu erbablarni xitay diniy ishlar idarisi kütüwalghan bolup, ular tekshürüsh jeryanida ürümchidiki meschit, diniy zatlar we yerlik xelqler bilen söhbette bolghan.

Xewerde neqil qilishiche, tekshürüsh ömikidiki bir eza: "Ziyaritimiz jeryanida shuni bayqiduqki, [u yerdiki] musulman ammisi toluq diniy erkinliktin behrimen boluwétiptu we özining diniy mejburiyetlirini erkin ada qiliwétiptu." dégen.

Eyni chaghda bu heqte ziyaritimizni qobul qilghan pakistandiki "Ömer Uyghur wexpi" ning mes'uli ömerjan ependi pakistan tekshürüsh ömkining hergizmu xitayning iradisige muxalip netije chiqarmaydighanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet