Пакистанлиқлар уйғур аяллирини қутқузуш үчүн намайиш қилди

Мухбиримиз әзиз
2018-09-25
Share

Уйғурлар дияридики сиясий бастурушниң кеңийишигә әгишип 2017-йили пакистанлиқ содигәрләргә ятлиқ болған бир қисим уйғур аяллириниң қәшқәрдә "тәрбийәләш"кә елип кетилгәнлики мәлум болған иди.

25-Сентәбир күни пакистанлиқ содигәрләрдин бир қисми бейҗиңдики пакистан әлчиханиси алдида намайиш қилип, пакистан һөкүмитиниң бу мәсилә һәққидә хитайға бесим қилишини тәләп қилди.

Ройтерс агентлиқиниң 25-сентәбирдики хәвиридә ейтилишичә, намайишчиларниң бири мирза имран бәг маралбешилиқ мәликәм мәмәт билән той қилған. Бу йил 33 яшқа киргән мәликәм 2017-йили юрти маралбешидики "тәрбийәләш" лагерида икки ай "өгиниш қилған". Әмма лагердин қоюп берилгәндин кейин юртидин айрилишқа йол қоюлмиған. Униң вә төт яшлиқ оғлиниң паспортиму тартивелинған. Имран бәг бу һәқтә мухбирға сөз қилип "әлчиханимизға әһвални ейтсам күтүп тур, күтүп тур, бир-икки күн күтүп турла дәйду" дегән.

Сәйшәнбә күни пакистанлиқ содигәрләр һәққидә соал соралғанда хитай ташқи ишлар министирликиниң баянатчиси гең шуаң өзиниң бу ишлардин хәвәрсиз икәнликини билдүргән.

Намайишчилардин миян шаһит иляс мухбирларниң соалиға җаваб бәргәндә уйғур аялиниң 2017-йили тутқун қилинғанлиқини, өзигә охшаш уйғурларға өйләнгән пакистанлиқлардин 300 нәччә кишиниң хитайда тутқун қилинған уйғур аяллиридин һечқандақ хәвәр алалмайватқанлиқини билдүргән. У бу һәқтә сөз қилип: "бу, хитайниң зор хаталиқи. Илгири кишиләр хитайниң мусулманларға қандақ муамилә қиливатқанлиқини билмәйтти. Һазир һәммә адәм билип кәтти" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт