Pakistanliqlar Uyghur ayallirini qutquzush üchün namayish qildi

Muxbirimiz eziz
2018-09-25
Share

Uyghurlar diyaridiki siyasiy basturushning kéngiyishige egiship 2017-yili pakistanliq sodigerlerge yatliq bolghan bir qisim Uyghur ayallirining qeshqerde "Terbiyelesh"ke élip kétilgenliki melum bolghan idi.

25-Séntebir küni pakistanliq sodigerlerdin bir qismi béyjingdiki pakistan elchixanisi aldida namayish qilip, pakistan hökümitining bu mesile heqqide xitaygha bésim qilishini telep qildi.

Roytérs agéntliqining 25-séntebirdiki xewiride éytilishiche, namayishchilarning biri mirza imran beg maralbéshiliq melikem memet bilen toy qilghan. Bu yil 33 yashqa kirgen melikem 2017-yili yurti maralbéshidiki "Terbiyelesh" lagérida ikki ay "Öginish qilghan". Emma lagérdin qoyup bérilgendin kéyin yurtidin ayrilishqa yol qoyulmighan. Uning we töt yashliq oghlining pasportimu tartiwélin'ghan. Imran beg bu heqte muxbirgha söz qilip "Elchixanimizgha ehwalni éytsam kütüp tur, kütüp tur, bir-ikki kün kütüp turla deydu" dégen.

Seyshenbe küni pakistanliq sodigerler heqqide so'al soralghanda xitay tashqi ishlar ministirlikining bayanatchisi géng shu'ang özining bu ishlardin xewersiz ikenlikini bildürgen.

Namayishchilardin miyan shahit ilyas muxbirlarning so'aligha jawab bergende Uyghur ayalining 2017-yili tutqun qilin'ghanliqini, özige oxshash Uyghurlargha öylen'gen pakistanliqlardin 300 nechche kishining xitayda tutqun qilin'ghan Uyghur ayalliridin héchqandaq xewer alalmaywatqanliqini bildürgen. U bu heqte söz qilip: "Bu, xitayning zor xataliqi. Ilgiri kishiler xitayning musulmanlargha qandaq mu'amile qiliwatqanliqini bilmeytti. Hazir hemme adem bilip ketti" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet