Гилгит-балтистандики йәрлик партийәләр йиғини чақирип, уйғур аяллирини қоюп беришни тәләп қилди

Мухбиримиз әркин
2018-04-09
Share

Пакистанниң гилгит-балтистан районидики йәрлик сиясий-партийә гуруһлар йиғин чақирип, хитай һөкүмити тәрипидин тутқун қилинип "тәрбийәләш мәркәзлири" гә соланған 50 дин артуқ гилгит-балтистанлиқлар билән аилә қурған уйғур аяллириниң қоюп берилишини тәләп қилған.

Һиндистан "асия хәлқара хәвәрлири" ториниң билдүрүшичә, гилгит-балтистандики барлиқ йәрлик партийә-гуруһлар өткән һәптә йиғин чақирип, юқириқи тәләпни оттуриға қойған. Йиғинда йәнә пакистан һөкүмитиниң хитайға бир йил мөһләт билән сода чәклимиси қоюшни тәләп қилған.

Хитай һөкүмити өткән йили гилгит-балтистанлиқ әркәкләр билән той қилған 50 дин артуқ уйғур аялни тутқун қилип, уларни "йепиқ тәрбийәләш лагерлири" ға соливалған. Бу уларниң аилә-тавабиатлирини еғир пәришанлиққа селип, уларниң әрлириниң қаттиқ наразилиқини қозғиған.

Йеқинда гилгит -балтистан парламенти қарар лайиһәси мақуллап, пакистан федератсийә һөкүмитиниң бу ишқа арилишишини, уйғур аяллириниң дәрһал қоюп берилип, аилиси билән җәм болушиға ярдәм қилишини тәләп қилған. Бирақ бәзи пакистан ахбарат васитилириниң илгири сүрүшичә, исламабад һөкүмити бу ишқа халимаслиқ муамилиси қоллинип, униңдин өзини қачуруп кәлгән.

"асия хәлқара хәвәрлири" ториниң хәвиридә, аниси хитай һөкүмити тәрипидин "тәрбийәләш" кә йиғивелинған гилгиттики бир балиниң "улар анамни елип кәтти. Мән уни бәк сеғиндим" дегән сөзлири нәқил кәлтүрүлгән.

Хәвәрдә йәнә рәһбәр хан исимлик бир кишиниң сөзи нәқил кәлтүрүлүп, "аяли тутқун қилинған аилиләрниң турмуши вәйран болди. Уларниң балилириға бәк яман болди. У йәрдә уларға мәктәп йоқ, улар қаранчуқсиз қалди" дейилгән.

Хәвәрдә қәйт қилинишичә, гилгиттики бир йәрлик рәһбири зат "пакистан гилгит-балтистанлиқларниң уйғур аяллирини қоюп бериш тәлипини хитай һөкүмитигә билдүрди.

Бу, икки тәрәп достлуқниң йолида кетиватқанлиқиниң ипадиси" дегән. Лекин йеқинда хитайниң пакистандики баш әлчиси яв җиң, гилгит-балтистан сода уюшмисиниң бир вәкилләр өмики билән көрүшүп, хитай даирилириниң уйғур аяллирини тутқун қилғанлиқини ақлиған. У, бу аялларниң тәкшүрүлүватқанлиқи, тәкшүрүштин кейин қоюп берилидиғанлиқини илгири сүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт