Gilgit-baltistandiki yerlik partiyeler yighini chaqirip, Uyghur ayallirini qoyup bérishni telep qildi

Muxbirimiz erkin
2018-04-09
Share

Pakistanning gilgit-baltistan rayonidiki yerlik siyasiy-partiye guruhlar yighin chaqirip, xitay hökümiti teripidin tutqun qilinip "Terbiyelesh merkezliri" ge solan'ghan 50 din artuq gilgit-baltistanliqlar bilen a'ile qurghan Uyghur ayallirining qoyup bérilishini telep qilghan.

Hindistan "Asiya xelq'ara xewerliri" torining bildürüshiche, gilgit-baltistandiki barliq yerlik partiye-guruhlar ötken hepte yighin chaqirip, yuqiriqi telepni otturigha qoyghan. Yighinda yene pakistan hökümitining xitaygha bir yil möhlet bilen soda cheklimisi qoyushni telep qilghan.

Xitay hökümiti ötken yili gilgit-baltistanliq erkekler bilen toy qilghan 50 din artuq Uyghur ayalni tutqun qilip, ularni "Yépiq terbiyelesh lagérliri" gha soliwalghan. Bu ularning a'ile-tawabi'atlirini éghir perishanliqqa sélip, ularning erlirining qattiq naraziliqini qozghighan.

Yéqinda gilgit -baltistan parlaménti qarar layihesi maqullap, pakistan fédératsiye hökümitining bu ishqa arilishishini, Uyghur ayallirining derhal qoyup bérilip, a'ilisi bilen jem bolushigha yardem qilishini telep qilghan. Biraq bezi pakistan axbarat wasitilirining ilgiri sürüshiche, islam'abad hökümiti bu ishqa xalimasliq mu'amilisi qollinip, uningdin özini qachurup kelgen.

"Asiya xelq'ara xewerliri" torining xewiride, anisi xitay hökümiti teripidin "Terbiyelesh" ke yighiwélin'ghan gilgittiki bir balining "Ular anamni élip ketti. Men uni bek séghindim" dégen sözliri neqil keltürülgen.

Xewerde yene rehber xan isimlik bir kishining sözi neqil keltürülüp, "Ayali tutqun qilin'ghan a'ililerning turmushi weyran boldi. Ularning balilirigha bek yaman boldi. U yerde ulargha mektep yoq, ular qaranchuqsiz qaldi" déyilgen.

Xewerde qeyt qilinishiche, gilgittiki bir yerlik rehbiri zat "Pakistan gilgit-baltistanliqlarning Uyghur ayallirini qoyup bérish telipini xitay hökümitige bildürdi.

Bu, ikki terep dostluqning yolida kétiwatqanliqining ipadisi" dégen. Lékin yéqinda xitayning pakistandiki bash elchisi yaw jing, gilgit-baltistan soda uyushmisining bir wekiller ömiki bilen körüshüp, xitay da'irilirining Uyghur ayallirini tutqun qilghanliqini aqlighan. U, bu ayallarning tekshürülüwatqanliqi, tekshürüshtin kéyin qoyup bérilidighanliqini ilgiri sürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet