Pakistan tashqi ishlar ministiri: "Uyghur musulmanlirining mesilisige qarita endishilirimizni xupiyane bildürüwatimiz"

Muxbirimiz erkin
2020-02-10
Share

Pakistan hökümiti tunji qétim xitayning Uyghurlargha tutqan mu'amilisidin endishe qiliwatqanliqi, lékin bu endishisini xitay da'irilirige "Xupiyane diplomatiye" arqiliq yetküzidighanliqini bildürgen.

"Bügünki pakistan" gézitining xewer qilishiche, bu sözlerni pakistan tashqi ishlar ministiri shang mahmut qureshi 10‏-féwral küni "Karachi igilik bashqurush instituti" diki bir murasimda sözligen nutqida tekitligen.

Pakistan hazirgha qeder xitayning 3 milyondek Uyghurni lagérlargha qamap, ularning medeniyiti we diniy étiqadini cheklishige qarita izchil süküt qilip kelgen. U hetta ötken yili b d t da xitayning Uyghur rayonidiki siyasitini qollighan. Özini dunyadiki musulmanlarning "Hamisi" dep kéliwatqan pakistanning bu herikiti gherb döletlirini we xelq'ara kishilik hoquq teshkilatlirini heyran qaldurghanidi.

Shah mahmut qureshining bu sözlerni pakistan bash ministiri imran xan ötken hepte b b s ning ziyaritini qobul qilip arqidinla qilishi diqqet qozghidi. Imran xan ötken hepte b b s ning ziyaritini qobul qilghanda Uyghurlar heqqide toxtilip, "Hazirche men bu mesilini toluq bilmeymen. Eger bu mesile heqqide toluq melumatqa érishsem xitay bilen xupiyane sözlishimen" dégen. "Bügünki pakistan" gézitining xewiride qeyt qilinishiche, shah mahmut qureshi pakistan hökümitining Uyghur musulmanlirigha tutulghan mu'amilige qarita öz endishisini "Xupiyane diplomatiye" arqiliq ipadilep kéliwatqanliqini bildürüp, "Hemme nersini ashkara tenqid qilishning zörüriyiti yoq" dégen. Lékin u, özlirining bu "Xupiyane diplomatiyesi" de Uyghurlargha alaqidar konkrét qaysi jehetlerdiki endishilirini ipadilep kéliwatqanliqini chüshendürmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet