Пакистан ташқи ишлар министири: «уйғур мусулманлириниң мәсилисигә қарита әндишилиримизни хупиянә билдүрүватимиз»

Мухбиримиз әркин
2020-02-10
Елхәт
Пикир
Share
Принт

Пакистан һөкүмити тунҗи қетим хитайниң уйғурларға тутқан муамилисидин әндишә қиливатқанлиқи, лекин бу әндишисини хитай даирилиригә «хупиянә дипломатийә» арқилиқ йәткүзидиғанлиқини билдүргән.

«Бүгүнки пакистан» гезитиниң хәвәр қилишичә, бу сөзләрни пакистан ташқи ишлар министири шаң маһмут қурәши 10‏-феврал күни «карачи игилик башқуруш институти» дики бир мурасимда сөзлигән нутқида тәкитлигән.

Пакистан һазирға қәдәр хитайниң 3 милйондәк уйғурни лагерларға қамап, уларниң мәдәнийити вә диний етиқадини чәклишигә қарита изчил сүкүт қилип кәлгән. У һәтта өткән йили б д т да хитайниң уйғур районидики сияситини қоллиған. Өзини дунядики мусулманларниң «һамиси» дәп келиватқан пакистанниң бу һәрикити ғәрб дөләтлирини вә хәлқара кишилик һоқуқ тәшкилатлирини һәйран қалдурғаниди.

Шаһ маһмут қурәшиниң бу сөзләрни пакистан баш министири имран хан өткән һәптә б б с ниң зияритини қобул қилип арқидинла қилиши диққәт қозғиди. Имран хан өткән һәптә б б с ниң зияритини қобул қилғанда уйғурлар һәққидә тохтилип, «һазирчә мән бу мәсилини толуқ билмәймән. Әгәр бу мәсилә һәққидә толуқ мәлуматқа еришсәм хитай билән хупиянә сөзлишимән» дегән. «Бүгүнки пакистан» гезитиниң хәвиридә қәйт қилинишичә, шаһ маһмут қурәши пакистан һөкүмитиниң уйғур мусулманлириға тутулған муамилигә қарита өз әндишисини «хупиянә дипломатийә» арқилиқ ипадиләп келиватқанлиқини билдүрүп, «һәммә нәрсини ашкара тәнқид қилишниң зөрүрийити йоқ» дегән. Лекин у, өзлириниң бу «хупиянә дипломатийәси» дә уйғурларға алақидар конкрет қайси җәһәтләрдики әндишилирини ипадиләп келиватқанлиқини чүшәндүрмигән.

Пикирләр (0)
Share
Толуқ бәт