Пакистан хитайдин қәрз төләш мәҗбурийитини йениклитип, малийә вә иқтисадий қийинчилиқни азайтишни тәләп қилған

Мухбиримиз ирадә
2020-04-16
Елхәт
Пикир
Share
Принт

«Иқтисад вақти гезити» ниң хәвәр қилишичә, пакистан хитайдин пакистан иқтисадий каридори (CPEC) қармиқидики електр енергийиси түридики 30 милярд доллардин артуқ болған пул төләш мәҗбурийитини йениклитип, малийә вә иқтисадий қийинчилиқни азайтишни тәләп қилған.

Хәвәрдә ейтилишичә, пакистанниң қәрз төләш мәҗбурийитини йениклитиш тәлипи униң ток ишләпчиқарғучилардин ток сетивелишта етибар беришкә еришиш тиришчанлиқиниң бир қисми болуп, униң йиллиқ айланма қәрзи 11 милярд доллардин ешип кәткән икән. Исмини ашкарилимиған бир пакистанлиқ парламент әзаси пакистан президенти ариф алвиниң 17-март бейҗиңға қилған зиярити мәзгилидә хитай тәрәпкә бу һәқтики тәлипини оттуриға қойғанлиқини ейтип бәргән.

Мәлум болушичә, хитайдин тарқалған таҗсиман вирус пакистан иқтисадиниму паләч һалға чүшүрүп қойған болуп, мушундақ кетивәрсә хитайдин алған қурулуш түрлири мәбләғлириниң қәрзини төлийәлмәйдиған әһвалға чүшүп қелиши мумкин икән. Пакистан баш министири имран хан йеқинда қилған бир сөзидә бир қанчә йил ичидила қәрзниң бир тирилйон 500 милярд рупийәдин ешип кетип, пакистанниң қайтуруш иқтидаридин һалқип кетидиғанлиқини әскәрткән.

Хитай-пакистан иқтисадий каридори хитай рәиси ши җинпиң оттуриға қойған «бир бәлвағ бир йол» қурулушиниң бир қисми болуп, 2015-йили хитай даирилири бу қурулушқа 50 милярд доллар мәбләғ салидиғанлиқини җакарлап иш башлиған. 3000 Километир узунлуқтики хитай-пакистан иқтисадий каридори уйғур елиниң қәшқәр шәһири билән пакистанниң гувадар портини таш йол, төмүрйол вә нефит туруба йоли арқилиқ бағлашни өз ичигә алидикән. Әйни вақитта пакистан рәһбәрлири бу каридорни «пакистанниң келәчики» дәп тәриплигән, бирақ пакистанлиқ бир қисим мутәхәссисләр бундақ юқири қәрз мәблиғиниң пакистанни мунқәрзлик йолиға елип маңидиғанлиқини агаһландурған иди.

Пикирләр (0)
Share
Толуқ бәт