Pakistan xitaydin qerz tölesh mejburiyitini yéniklitip, maliye we iqtisadiy qiyinchiliqni azaytishni telep qilghan

Muxbirimiz irade
2020-04-16
Élxet
Pikir
Share
Print

"Iqtisad waqti géziti" ning xewer qilishiche, pakistan xitaydin pakistan iqtisadiy karidori (CPEC) qarmiqidiki éléktr énérgiyisi türidiki 30 milyard dollardin artuq bolghan pul tölesh mejburiyitini yéniklitip, maliye we iqtisadiy qiyinchiliqni azaytishni telep qilghan.

Xewerde éytilishiche, pakistanning qerz tölesh mejburiyitini yéniklitish telipi uning tok ishlepchiqarghuchilardin tok sétiwélishta étibar bérishke érishish tirishchanliqining bir qismi bolup, uning yilliq aylanma qerzi 11 milyard dollardin éship ketken iken. Ismini ashkarilimighan bir pakistanliq parlamént ezasi pakistan prézidénti arif alwining 17-mart béyjinggha qilghan ziyariti mezgilide xitay terepke bu heqtiki telipini otturigha qoyghanliqini éytip bergen.

Melum bolushiche, xitaydin tarqalghan tajsiman wirus pakistan iqtisadinimu palech halgha chüshürüp qoyghan bolup, mushundaq kétiwerse xitaydin alghan qurulush türliri mebleghlirining qerzini töliyelmeydighan ehwalgha chüshüp qélishi mumkin iken. Pakistan bash ministiri imran xan yéqinda qilghan bir sözide bir qanche yil ichidila qerzning bir tirilyon 500 milyard rupiyedin éship kétip, pakistanning qayturush iqtidaridin halqip kétidighanliqini eskertken.

Xitay-pakistan iqtisadiy karidori xitay re'isi shi jinping otturigha qoyghan "Bir belwagh bir yol" qurulushining bir qismi bolup, 2015-yili xitay da'iriliri bu qurulushqa 50 milyard dollar meblegh salidighanliqini jakarlap ish bashlighan. 3000 Kilométir uzunluqtiki xitay-pakistan iqtisadiy karidori Uyghur élining qeshqer shehiri bilen pakistanning guwadar portini tash yol, tömüryol we néfit turuba yoli arqiliq baghlashni öz ichige alidiken. Eyni waqitta pakistan rehberliri bu karidorni "Pakistanning kélechiki" dep teripligen, biraq pakistanliq bir qisim mutexessisler bundaq yuqiri qerz meblighining pakistanni munqerzlik yoligha élip mangidighanliqini agahlandurghan idi.

Toluq bet