Wang chishen xitay pakistanning négizlik dölet menpe'etini pütün küchi bilen qoghdaydu, dégen

Muxbirimiz irade
2019-05-27
Élxet
Pikir
Share
Print

Xitayning mu'awin dölet re'isi wang chishen 26-may yekshenbe küni 3 künlük resmiy ziyaret üchün pakistan'gha yétip kelgen.

Birleshme agéntliqining xewer qilishiche, wang chishenning bu qétimliq ziyariti bu yil 4-ayda pakistan bash ministiri imran xanning xitaygha qilghan ziyaritidin kéyinki yene bir qétimliq yuqiri derijilik ziyaret bolup hésablinidiken. Bu qétimliq uchrishishta xitay-pakistan bilen "Bir belwagh bir yol" qurulushigha munasiwetlik birqanche muhim kélishimlerni imzalaydiken.

"Hindistan waqti" gézitining xewer qilishiche, wang chishen yekshenbe küni "Pakistan-xitay instituti" da orunlashturulghan bir yighinda söz qilghanda "Hazir dunyaning nahayiti zor özgirishlerni bashtin kechürüwatqanliqini, emma dunya shara'iti qandaq özgirishidin qet'iynezer xitayning pakistanning négizlik menpe'etini qollashtin qet'iy waz kechmeydighanliqini" bildürgen.

U yene "Xitay bilen pakistan barawerlik we ortaq menpe'et yetküzüsh jehette eng toghra tallashni qildi," dégen.

Uning yuqiriqi bu sözliri küchlük diqqet qozghidi. Chünki islamgha qarshi heriketlerni küchlük tenqidlesh bilen tonulghan pakistan bash ministiri imran xan yéqinda "Türkiye döletlik radiyosi" we "Maliye waqti" gézitining ziyaritini qobul qilghanda 2 milyon'ghiche Uyghurning lagérgha qamilish mesilisini bilmeydighanliqini ilgiri sürgen we küchlük tenqidke uchrighan idi.

Toluq bet