“пакистан-хитай иқтисадий каридори” қурулушиға пакистандики йәрлик хәлқләрниң наразилиқи күчәймәктикән

Мухбиримиз ирадә
2018-07-25
Share

Хитайниң “бир бәлвағ бир йол қурулуши” дики муһим бекәтләрниң бири болған “пакистан-хитай иқтисадий каридори” қурулуши пакистандики йәрлик хәлқләргә күлпәт елип кәлмәктикән. Бу һәқтә “дипломат” журнилида майкил ковриг тәрипидин елан қилинған бир мулаһизидин қариғанда, нөвәттә 60 милярд доллар мәбләғ селинидиған “пакистан-хитай иқтисадий каридори” қурулуши пакистан сиясәтчилириниң күчлүк қоллишиға еришиватқан болсиму, әмма йәрлик хәлқниң бу қурулушқа болған қаршилиқи күчәймәктикән.

Буниңдики асаслиқ сәвәб болса қурулушниң очуқ-ашкара болмаслиқи билән биргә, униңдин киридиған киримниң тарқилишидики тәңсизлик икән. Буниң әң ярқин өрники балучистан райони икән. Апторниң ейтишичә, иқтисадий каридори кесип өтидиған балучистан-гвадар порти районлирида һөкүмәт йәрликләрниң йерини бу қурулуш сәвәблик тартивалидиған һәм шундақла кишиләрни мәҗбурий көчүридиған ишлар көпийип кәткән. Пакистан һөкүмити йәрлик хәлқниң наразилиқиға қулақ селип, улар билән мәсилини кеңәш билән һәл қилиш йолини тутмай, әксичә уларни бастуруш васитиси қолланған. 

Бундин сирт йәнә, хитайға башқурушқа өткүзүп берилгән гвадар портидин киридиған пайдиниң 91 пирсәнтини хитай алса, аран 9 пирсәнтини пакистан һөкүмити алидикән. Әмма балучистан йәрлик һөкүмити болса һечнемигә еришәлмәйдикән. Униң үстигә хитай һөкүмитиниң гвадар портини ахирқи һесабта һәрбий мәқсәтлири үчүн ишлитиш мумкинчиликиму қаршилиқни күчәйтиватқан йәнә бир муһим амил икән. 

Аптор мақалисидә, балучистан-гвадар портиниң “хитайниң бир бәлвағ бир йол қурулуши” ниң мувәппәқийәткә еришиш яки еришәлмәсликидә интайин муһим әһмийәткә игә икәнликини тәкитләп, әгәр пакистан вә хитай һөкүмити дәрһал бу наразилиқни пәсәйтидиған тәдбирләрни алмиған тәқдирдә, райондики қораллиқ қаршилиқ һәрикәтлири йүз бериши мумкинлики вә буниң билән хитайниң узун муддәтлик истратегийилик пиланиниң еғир зәрбигә учрайдиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт