“Pakistan-xitay iqtisadiy karidori” qurulushigha pakistandiki yerlik xelqlerning naraziliqi kücheymektiken

Muxbirimiz irade
2018-07-25
Share

Xitayning “Bir belwagh bir yol qurulushi” diki muhim béketlerning biri bolghan “Pakistan-xitay iqtisadiy karidori” qurulushi pakistandiki yerlik xelqlerge külpet élip kelmektiken. Bu heqte “Diplomat” zhurnilida maykil kowrig teripidin élan qilin'ghan bir mulahizidin qarighanda, nöwette 60 milyard dollar meblegh sélinidighan “Pakistan-xitay iqtisadiy karidori” qurulushi pakistan siyasetchilirining küchlük qollishigha érishiwatqan bolsimu, emma yerlik xelqning bu qurulushqa bolghan qarshiliqi kücheymektiken.

Buningdiki asasliq seweb bolsa qurulushning ochuq-ashkara bolmasliqi bilen birge, uningdin kiridighan kirimning tarqilishidiki tengsizlik iken. Buning eng yarqin örniki baluchistan rayoni iken. Aptorning éytishiche, iqtisadiy karidori késip ötidighan baluchistan-gwadar porti rayonlirida hökümet yerliklerning yérini bu qurulush seweblik tartiwalidighan hem shundaqla kishilerni mejburiy köchüridighan ishlar köpiyip ketken. Pakistan hökümiti yerlik xelqning naraziliqigha qulaq sélip, ular bilen mesilini kéngesh bilen hel qilish yolini tutmay, eksiche ularni basturush wasitisi qollan'ghan. 

Bundin sirt yene, xitaygha bashqurushqa ötküzüp bérilgen gwadar portidin kiridighan paydining 91 pirsentini xitay alsa, aran 9 pirsentini pakistan hökümiti alidiken. Emma baluchistan yerlik hökümiti bolsa héchnémige érishelmeydiken. Uning üstige xitay hökümitining gwadar portini axirqi hésabta herbiy meqsetliri üchün ishlitish mumkinchilikimu qarshiliqni kücheytiwatqan yene bir muhim amil iken. 

Aptor maqaliside, baluchistan-gwadar portining “Xitayning bir belwagh bir yol qurulushi” ning muweppeqiyetke érishish yaki érishelmeslikide intayin muhim ehmiyetke ige ikenlikini tekitlep, eger pakistan we xitay hökümiti derhal bu naraziliqni peseytidighan tedbirlerni almighan teqdirde, rayondiki qoralliq qarshiliq heriketliri yüz bérishi mumkinliki we buning bilen xitayning uzun muddetlik istratégiyilik pilanining éghir zerbige uchraydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet