Доналд трамп әйиблигән пакистанға хитай чапан япти

Мухбиримиз әзиз
2017.08.22

Мәлум болушичә, пакистан һөкүмитиниң афғанистан-пакистан чеграсидики бәзи районларда паалийәт қиливатқан талибанниң қалдуқ күчлиригә қарита йетәрлик һәрикәт қолланмайватқанлиқи сәвәблик, америка президенти доналд трамп пакистанни әйиблигән. Әмма, кона иттипақдиши болған хитай һөкүмити оттуриға чиқип пакистан үчүн сөз қилип уларға чапан япқан.

Бирләшмә агентлиқиниң бүгүнки хәвиридә ейтилишичә, доналд трамп америка һөкүмити тәстиқлиған нәччә милярд америка доллирилиқ террорлуққа қарши туруш мәблиғи пакистанға ғайәт зор мәнпәәт елип кәлгән болсиму, пакистанниң бу мәнпәәтләргә виҗданән җаваб қайтурмиғанлиқини алаһидә тәкитлигән. У бу һәқтә сөз қилип “биз пакистанға милярдлап доллар бериватқан болсақму, биз йоқатмақчи болған террорчилар пакистанда панаһлинип йүрмәктә һәмдә хәлқимизни өлтүрүшни давам қилмақта. Биз әмди буниңға давамлиқ сәври қилалмаймиз” дегән.

Хитай ташқи ишлар министирлиқиниң баянатчиси хуа чүнйиң буниңға җавабән пакистанниң әң алдинқи сәптә орун туруп террорлуққа қарши күрәш қиливатқанлиқини, бу җәһәтләрдә “зор нәтиҗиләрни қолға кәлтүрүп, көп қурбан бәргәнлики” ни тәкитлигән. У бу һәқтә тохтилип “хәлқара җәмийәт пакистанниң террорлуққа қарши күрәштики әҗригә көз юмувалмаслиқи лазим, дәп қараймиз” дегән.

Ройтерис агентлиқиниң бу һәқтики хәвиридә ейтилишичә, хитай билән пакистан изчил һалда “қәдинасларчә достлуқ” мунасивитини давам қилдуруватқан мәмликәтләр икән. Һазир хитай һөкүмити пакистан, афғанистан қатарлиқ җайлардики ислам қораллиқлириниң уйғурлар районидики зорлуқ һәрикәтлири билән мунасивәт қурушиниң алдини елиш үчүн пакистан билән бирликтә күрәш қилмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.