Xitay puqralirigha pakistan kimlikining bérilishi ghulghula qozghidi

Muxbirimiz eziz
2017-11-07
Élxet
Pikir
Share
Print

Xitay bilen en'eniwi dostluq munasiwitide bolup kéliwatqan pakistan hökümiti yéqinda pakistandiki bir qisim xitay puqralirigha pakistan kimlikini tarqatqan.

Bu xewer tarqalghandin kéyin pakistanda zor ghulghula qozghalghan.

"Hindistan iqtisad waqti" gézitining xewiride éytilishiche, afghanistandin qéchip kélip pakistanda panahliniwatqan afghan qachqunliri alalmaywatqan pakistan kimlikining pakistandiki xitay puqralirigha bérilishi pakistanda eng keng tarqalghan xewerlerning biri bolup qalghan.

Köpligen pakistanliqlar buni "Xitayning pakistan'gha tajawuz qilishqa bashlighanliqini körsitidu" dep qarighan. Yene nurghunlighan kishiler buni "Xitay-pakistan iqtisadiy karidori" qurulushining pakistan'gha körsitiwatqan tesiri, dep qaraydighanliqini bildürgen.

"Baluchistan sariyi" gézitining bu heqtiki xewirige qarighanda, bu heqtiki ghulghula bekla ewj alghanliqtin pakistanning ichki ishlar ministiri éhsan iqbal bu heqte chüshenche bérip, "Pakistan kimliki bérilgen bu xitayning ata-anisi nechche on yil ilgiri pakistan puqraliqigha ötken kishiler" dégen. Emma uning bu xil chüshendürüshini kishiler qobul qilmighan, shuningdek "Shinjangda Uyghur musulmanlirini basturuwatqan xitay hökümitining pakistanliqlarning ishenchini qolgha keltürmiki asan emes" dégen pikirler otturigha chiqqan.

Melum bolushiche, "Xitay-pakistan iqtisadiy karidori" bashlan'ghandin buyan pakistandiki xitaylarning sani tézdin ashqan. Amérika pakistandin yiraqlashqandin kéyin xitay pakistanning asasliq iqtisadiy yölenchüki bolup qalghan. Emma yene zor sandiki pakistanliqlar "Bu iqtisadiy karidor pakistandin köre xitaygha bekrek paydiliq" dep qaraydighanliqini bildürgen.

Toluq bet