Pakistan-xitay bilen keshmirdiki bir su ambiri qurulushigha da'ir qararda "Bir-biridin xewersiz" iken

Muxbirimiz irade
2017-11-16
Élxet
Pikir
Share
Print

Xitay bilen pakistan arisidiki "Bir belwagh, bir yol" istratégiyisidiki bezi soda kélishimliride kélishmeslik yüz bériwatqanliqi melum bolmaqta.

Bügün hindistanning "Soda dunyasi" géziti tarqatqan bir xewerde éytilishiche, pakistan xewer agéntliqliri charshenbe küni pakistanning su we éliktér tereqqiyat idarisi bashliqi muzammil hüseyinning sözini neqil élip turup, pakistanning keshmirdiki "Diyamir-basha" su ambiri qurulushidin chékinip chiqidighanliqini xewer qilghan iken. Mezkur su ambiri qurulushi xitayning "Bir belwagh, bir yol" qurulushi ramkisi astidiki qurulush pilani bolup, pakistan emeldari sözide "Xitayning bu qurulushqa meblegh sélish shertliri imkansiz we pakistanning menpe'etige qarshi bolghanliqtin" bu qurulushtin chékinip chiqidighanliqini éytqan iken.

Xewerde éytilishiche, pakistan talash-tartishta turuwatqan keshmir rayonidiki hindi deryasigha sélinidighan su ambiri qurulushigha hindistan küchlük qarshiliq qilghanliqtin dunya bankisi qatarliq orunlardin meblegh alalmighan. Xitaymu eger meblegh salghan teqdirde bu su ambirining xitaygha tewe bolidighanliqini shert qilip turuwalghan bolghachqa, pakistan bu qurulushtin waz kechmekchi bolghan.

Biraq, bügün xitay tashqi ishlar ministirliqining bayanchisi géng shu'ang muxbirlarning bu heqtiki so'allirigha jawab bergende özining bu ishtin xewiri yoqluqini ilgiri sürgen. U, muxbirlarning su ambiri qurulushi heqqidiki so'allirigha peqet "Pakistan-xitay munasiwetliri nahayiti chongqur, bir belwagh bir yol qurulushi nahayiti ongushluq dawam qilmaqta" dégen jawabni bergen.

Xitay hökümiti "Bir belwagh bir yol" qurulushini teshwiq qilghanda nurghun közetküchiler bu qurulush késip ötidighan jaylarda saqlinip yatqan xewpsizlik mesililiridin bashqa yene baluchistan, keshmir qatarliq igilik hoquq mesilisi mewjut rayonlar bolghachqa bu qurulushning emeliylishishige guman bilen qarighan iken.

Toluq bet