Xitay pakistanda turushluq puqralirini "Térrorluq hujumi" din agahlandurdi

Muxbirimiz erkin
2017-12-08
Élxet
Pikir
Share
Print

Xitayning pakistandiki elchixanisi bügün pakistanda turushluq xitay puqralirigha agahlandurush bérip, xitay puqralirini "Térrorluq hujumi" din agah bolushqa chaqirghan. Birleshme agéntliqining ilgiri sürüshiche, xitay elchixanisi "Térrorchilar" ning pakistandiki xitay puqralirigha we xitay shirketlirige qarshi "Pat yéqinda bir qatar térrorluq hujumi" élip bérishni pilanlighanliqigha da'ir istixbarat tapshuruwalghanliqini bildürgen.

Lékin xitay elchixanisi agahlandurushida "Térrorluq hujumi" ning qachan we kimler teripidin élip bérilidighanliqi heqqidiki tepsilatlar tilgha élinmighan. Xitayning "Pakisyan-xitay iqtisadiy karidori" qurulushi resmiy yolgha qoyulup, uning pakistandiki tesiri kéngiyishke bashlighandin buyan xitaygha qarshi hujumlar köpeygen.

Bu yil 6‏-ayda pakistanning balujistan ölkiside er-ayal ikki xitay puqrasi görüge élinp öltürülgen. Bu yil 10‏-ayda pakistanning "Shepeq" géziti "Sherqiy türkistan islam herikiti" ning pakistan'gha adem ewetip, xitayning pakistanda turushluq bash elchisi sung wéydongni öltürüshni pilanlighanliqi, xitayning pakistandiki elchixanisining pakistan ichki ishlar ministirliqigha xet yézip, xitay puqralirining bixeterlikini qoghdashni telep qilghanliqini xewer qilghan.

"Shepeq" gézitining xewiride atalmish "Térrorchi" ning qolgha élin'ghanliqi we xitaygha ötküzüp bérilgenlikini ilgiri sürülgen. Lékin bezi közetküchiler, xitayning bu xil uchurlarni pakistan'gha bésim ishlitip, Uyghurlarni kontrol qilish üchün qolliniwatqanliqini bildürgen idi.

Birleshme agéntliqining xewiride qeyt qilishiche, xitay elchixanisi bügün élan qilghan agahlandurushi uqturushida xitay puqralirini "Hoshyar bolushqa, shexsi bixeterlikke diqqet qilishqa, adem toplan'ghan yerlerge barmasliq" qa chaqirghan.

Toluq bet