Xitay-pakistan iqtisadiy karidoridiki 3 yolning qurulushi waqitliq toxtitilghan

Muxbirimiz shöhret hoshur
2017-12-13
Élxet
Pikir
Share
Print

Bügün xelq'ara axbaratlarda xewer qilinishiche, xitay terep, xitay-pakistan iqtisadiy karidori pilanining bir qismi bolghan 3 yol qurulushigha bériliwatqan pulni toxtitip qoyghan.

Pakistan döletlik pilan komitétining ministiri éhsan iqbal bügün bu bu heqte axbaratchilargha qilghan sözide, xitay terepning téxnikiliq sewebler tüpeylidin üch yol qurulushigha bériliwatqan xirajetni toxtitip qoyghanliqi we xitay terep iqtisadiy méxanizmni közdin kechürgendin kéyin xirajetni testiqlaydighanliqini éytqan.

Melum bolushiche, Uyghur rayoni bilen pakistanning guwadar porti arisida élip bérilidighan yuqiri süretlik yol, tömüryol we énérgiye qurulushini öz ichige xitay-pakistan iqtisadi karidori pilanigha 50 milyon dollar xirajet qilinmaqchiken. "Iqtisad waqti géziti" ning bügünki bu heqtiki xewiride bayan qilinishiche, pakistanning alaqidar emeldarliridiki parixorluq sewebidin xitay terep mezkur qurulushqa bériwatqan xirajitini waqitliq toxtitishqa mejbur bolghan. Yene bezi menbelerde déyilishiche, xitayning bu pulni toxtitishigha pakistanning ötken ayda bir éléktr énérgiye qurulushining igidarchiliqini xitaygha bérishni ret qilghanliqi seweb bolghan.

Xelq'aradiki bezi közetküchi we pa'aliyetchiler, xitayning pakistandiki mezkur qurulushini, Uyghur rayonidin bashqa pakistanning balujistan we baltstan rayondiki xelqlerningmu siyasiy, iqtisadiy we ijtima'iy menpe'etlirige ziyanliq dep qarap kelgen we döletler ara hemkarliqning qoshna milletlerning menpe'etini qurban qilish bedilige ornitilmasliqini teshebbus qilip kelgen idi.

Toluq bet