Awam palata ezasi maykil makkawl amérika jama'itini Uyghur mejburiy emgikidin payda éliwatqan shirketlerge qarshi turushqa chaqirdi

Amérika CNN téléwiziyesining tonulghan muxbiri jeyk tepér Uyghur mejburiy emgiki we uningdin payda éliwatqan bir qisim amérika shirketliri heqqide mexsus xewer ishligen.

Xewerde u amérika dölet mejlisining bu heqtiki doklatigha asasen amérikaliqlar kiyiwatqan kiyim-kéchek, ayaq we hetta öyliride ishlitiwatqan quyash énirgiye taxtiliriningmu Uyghurlarning mejburiy emgikidin kelgen bolushi mumkinlikini bildürgen.

U programmisida amérika awam palata ezasi maykil makkawlni ziyaret qilghan bolup, mayki makkawl bir qisim chong amérika shirketlirining mejburiy emgektin payda éliwatqan we hetta Uyghurlargha qaritiliwatqan irqiy qirghinchiliqqa shérik boluwatqan bolushi mumkinlikini bildürgen.

Uningda körsitilishiche, kokakola qatarliq az dégende 8 amérika shirkiti mejburiy emgektin payda éliwatqan bolup, amérikaliq dölet mejlisi ezaliri buninggha xatime bérish üchün heriket qilmaqtiken.

Biraq maykil makkawl yuqiriqi'i shirketlerning ilgiri Uyghur mejburiy emgikining aldini élish qanun layihesige qarshi lobichiliq qilip, uni yoq qilghanliqini, bu qétimmu yene shundaq qilishi mumkinlikini dégen.

Kokakola we nayké shirketliri bolsa özlirining bu layihege qarshi lobichiliq qilghanliqini ret qilish bilen birge, öz teminlesh zenjirlirida mejburiy emgek yoqliqini ilgiri sürgen.

Biraq CNN téléwiziyesining muxbiri ularning bu dégenlirining pakitlarni yoqqa chiqiralmaydighanliqini tekitlep, bu chong shirketlerni wijdani bilen ish qilishqa bésim ishlitish üchün amérika jama'etchilikining oyghinishi kéreklikini bildürgen. Awam palata ezasi maykil makkawlmu sözide: “Kishiler emdi oyghinidighan waqit keldi, bizning wehshiylikke, irqiy qirghinchiliqqa qarshi turidighan waqtimiz keldi, bizning exlaqiy burchimiz bar, biz kishilik hoquq terepte turamduq yaki bu chong shirketler tereptimu?” dégen.