Uyghurlar xitayning “Panus bayrimi” ni tebrikleshke orunlashturulghan

Muxbirimiz irade
2019.02.19

Xitay axbarat wasitiliri bügünki xewerliride Uyghur élining jay-jaylirida “Panus bayrimi” kütüwélin'ghanliqini xewer qildi.

“Xitay xewerler tori” we “Tengritagh tori” qatarliqlarda tarqitilghan süretlik xewerlerde, Uyghur a'ililirining öylirige panus ésip bayramni tebrikligenliki, xitay “Qoshmaq tughqan” liri bilen bille “Yüenshyaw” yégenliki teshwiq qilin'ghan.

“Tengritagh tori” ning xewiridin qarighanda, 17-féwral küni, uchturpan nahiye bazirida 400 din artuq kishi yene “Panus bayrimi” munasiwiti bilen “Beldumbaq usuli” oynashqa orunlashturulghan.

Uyghurlarni tetqiq qilip kéliwatqan amérikiliq antropolog derrin baylér yéqinda élan qilghan bir maqaliside, xitayning Uyghur rayonidiki chaghanliq pa'aliyetliri heqqidiki widiyo we resimler üstide mulahize yürgüzüp, körünüshlerdiki keypiyatlarning pütünley sün'iy ikenliki, Uyghurlarning bu yilliq chaghan pa'aliyetlirige mejburiy qatnashturulghanliqini ilgiri sürgen. U, Uyghurlarning bu xildiki tebriklesh pa'aliyetlirige qatnashmighan teqdirde “Yépiq terbiye lagéri” gha ekétilish xewpige duch kélidighanliqini bayan qilghan idi.

Derrin baylér xitay chaghan pa'aliyetlirini, Uyghurlarning xitay dölitige bolghan sadaqitini sinaydighan bir imtihan meydani süpitide qollan'ghanliqini bildürgen.

Xitay hökümiti bu yilqi chaghan bayrimini Uyghurlar zich olturaqlashqan, nahiyeler we yéza-kentlerde Uyghurlarni beldumbaq we yanggir usuli oynash, ejdiha oynitish, ishiklerge mesnewi, hoyla-aramlargha we kochilargha panus ésish qatarliqlar xitayche örp-adet boyiche ötküzüshke teshkilligen idi.

Uyghurlarni xitayning en'eniwi bayramlirini ötküzüshke keng kölemde orunlashturghan xitay hökümitining yétip kélish aldida turghan Uyghurlarning en'eniwi noruz bayrimida shuningdek bu yilqi ramizan éyida néme qilidighanliqi diqqet qozghimaqta. Chünki xitay da'iriliri yillardin buyan Uyghurlarning ramizan ötküzüshige chek qoyup kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.