Xitayning chet'ellerdin qayturup kelgen parixor emeldarlirining sani ashkarilandi

Muxbirimiz méhriban
2017-01-10
Share

Xitay intizam tekshürüsh komitéti xitay merkizi axbarat ishxanisida muxbirlargha bayanat bérip, 2014-yildin buyanqi 3 yil ichide chet'ellerge qéchip ketken xitay emeldarlardin 2566 kishini we 8 milyard 600 milyon som pulni qayturup kelgenlikini élan qildi.

Xewerde xitay intizam tekshürüsh komitétining mu'awin partkom sékrétari wu yülyangning sözi neqil élinip, chet'ellerdin qayturup kélin'gen 2566 emeldar ichide qizil renglik tutush buyruqi chiqirilghan 100 nechche emeldarning 37 nepirining torgha chüshkenliki alahide tekitlen'gen.

Halbuki, chet'ellerdiki xitay démokratlirining bayanati we xelq'ara taratqularda, xitay re'isi shi jinpingning teshebbusi bilen 2013-yili yil axiri bashlan'ghan "Parixor emeldarlargha zerbe bérish" herikitining xitay kompartiyisi ichidiki jyang zémin guruhi bilen shi jinping terepdarlirining hoquq talishish körüshi ikenliki ilgiri sürülgen.

Xitayning hökümet taratqulirimu jazalan'ghan emeldarlarning parixorluqtin bashqa siyasiy jinayitimu barliqini étirap qilghan bolup, en'gliye b b s agéntliqining ötken seyshenbe yeni 3-yanwardiki xewiride xitayning partiye organ zhurnili "Emeliyet" te élan qilin'ghan, xitay re'isi shi jinpingning 6-omumiy yighinida sözligen nutqidiki "Ju yüngkang, bo shiley, go boshyung, shü seyxu, ling jixu'a qatarliqlar peqetla iqtisadiy jehette parixorluq, xiyanetchilik jinayiti ötküzüp qalmastin, belki siyasiy jehette guruh uyushturup, suyiqest pilanlighan" dégen sözliri neqil élin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet