Xitay aliy sotining mu'awin bashliqi parixorluq bilen sotlandi

Muxbirimiz méhriban
2017-01-10
Share

Xitay hökümet taratquliridin junggo xewerler torining 10-yanwardiki xewiridin melum bolushiche, 10-yanwar seyshenbe küni xitay aliy sotining mu'awin bashliqi shi shawming tenjin 2-ottura sotida parixorluq bilen eyiblinip, sotlandi.

Melum bolushiche, sotta tenjin sheherlik 2-teptish mehkimisi shi shawmingning 1996-yilidin 2016-yilighiche bolghan ariliqta xitay aliy sotning iqtisadiy majiralar sot kolligiyisining mu'awin sotchisi, xelq ishliri sot kolligiyisi 2-sotining sotchisi, aliy sot komitétining hey'et ezasi we aliy sotning mu'awin bashliqi wezipisini ötesh jeryanida xizmet qulayliqidin paydilinip para alghan pul sommisi 114 milyon xitay puligha yetken.

Xitay analizchiliridin obzorchi chén pokung ependi twitér torida mezkur xewer heqqide toxtilip: "Xitay aliy soti emeldarining parixorluq bilen eyiblinishi ejeblinerlik emes. Chünki, héchqandaq bir öktichi partiyining riqabiti we nazariti bolmighan kompartiye hökümranliqidiki xitayda, emeldarlarning parixorluqi hemme ademge ashkara bolghan omumiy ehwal. Shunga jazaliniwatqan emeldarlar emeliyette parixorluq sewebidin emes, belki nöwette hakimiyet yürgüzüwatqan shi jinping guruhining küshendisi bolghini üchünla jazalanmaqta. Xitay re'isi shi jinpingmu bultur échilghan xitay kompartiye yighinida, parixorluq bilen jazalan'ghan emeldarlarning yene "Siyasiy suyiqest pilanlighanliq we siyasiy guruhwazliq jinayi qilmishlirining barliqi" ni étirap qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet