Намратларни йөләшкә мәсул парихор компартийә секретари йениклитип җазалашқа учриди

Мухбиримиз үмидвар
2017-01-11
Share

Уйғур дияриниң намратларни йөләш ишлириға мәсул бир нәпәр назир дәриҗилик компартийә секретари парихорлуқ қилмиши билән қамақ җазасиға һөкүм қилинди.

Үрүмчидә чиқидиған "қанунчилиқ" ториниң хәвиридин ашкарилинишичә, уйғур аптоном районлуқ һөкүмәт қармиқидики намратларни йөләш ишханисиниң сабиқ партийә гуруппа секретари җав гомин йеқинда үрүмчи шәһәрлик оттура сот мәһкимиси тәрипидин 5 милйон 393 миң сомдин артуқ пулни хиянәт қилғанлиқ җинайити билән йәттә йиллиқ қамақ җазасиға һөкүм қилинип, 700 миң сом җәриманә қоюлған. Әмма бу, сотниң униңға бәргән йениклитилгән җазасидур.

Хәвәрдә илгири сүрүлүшичә, җав гомин өз һоқуқидин пайдилинип, намратларни йөләшкә мунасивәтлик ширкәтләргә намратларни йөләш үчүн аҗритилған пулларни берип, униңдин өсүм елиш, йәр һөддигә елиш, қурулуш тонуштуруш, хизмәт йөткәш вә башқа васитиләр арқилиқ 5 милйон393 миң сом қиммитидә байлиққа еришкән. Вәһаләнки, сот мәһкимиси җав гоминниң җинайитиниң еғирлиқиға қаримай, униң өз қилмишини иқрар қилиш вә башқиларниң җинайи қилмишлирини маслишип паш қилип хизмәт көрсәткәнлики һәм еришкән мал-мүлүк вә пулларни қайтуруп бәргәнлики үчүн униңға йениклитип җаза бәргән.

Җав гомин 2004-йилидин кейин, сабиқ партком секретари ваң лечүән дәвридә уйғур аптоном районлуқ намратларни йөләш ишханисиниң мудири вә секретарлиқ вәзиписигә тәйинлинип, бу хизмәтни таки 2015-йили, тәкшүрүш астиға елинғучә атқурған.

Хәвәрләрдин мәлум болушичә, ши җинпиң һакимийәтни игилигәндин буян башқа өлкиләрдикигә охшаш, уйғур дияридиму арқиму-арқидин бир қисим назир, муавин назир, башқарма, бөлүм вә йеза, кәнт башлиқи дәриҗилик кадирлар чириклик қилмишлири сәвәбидин җазаланған болуп, буларниң ичидә уйғурлардин аптоном районлуқ һөкүмәтниң баш катипи алимҗан мәмтиминму бар.

Учурлардин мәлум болушичә вә көзәткүчиләрниң қаришичә, җазаланған хитай кадирлириниң көпинчиси парихорлуқ билән мунасивәтлик болсиму, әмма бир қисим уйғур кадирлириниң җазалинишида улардики миллий туйғу вә сиясий мәвқә асас сәвәб болғанлиқи тәһлил қилинмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт