Namratlarni yöleshke mes'ul parixor kompartiye sékrétari yéniklitip jazalashqa uchridi

Muxbirimiz ümidwar
2017-01-11
Share

Uyghur diyarining namratlarni yölesh ishlirigha mes'ul bir neper nazir derijilik kompartiye sékrétari parixorluq qilmishi bilen qamaq jazasigha höküm qilindi.

Ürümchide chiqidighan "Qanunchiliq" torining xewiridin ashkarilinishiche, Uyghur aptonom rayonluq hökümet qarmiqidiki namratlarni yölesh ishxanisining sabiq partiye guruppa sékrétari jaw gomin yéqinda ürümchi sheherlik ottura sot mehkimisi teripidin 5 milyon 393 ming somdin artuq pulni xiyanet qilghanliq jinayiti bilen yette yilliq qamaq jazasigha höküm qilinip, 700 ming som jerimane qoyulghan. Emma bu, sotning uninggha bergen yéniklitilgen jazasidur.

Xewerde ilgiri sürülüshiche, jaw gomin öz hoquqidin paydilinip, namratlarni yöleshke munasiwetlik shirketlerge namratlarni yölesh üchün ajritilghan pullarni bérip, uningdin ösüm élish, yer höddige élish, qurulush tonushturush, xizmet yötkesh we bashqa wasitiler arqiliq 5 milyon393 ming som qimmitide bayliqqa érishken. Wehalenki, sot mehkimisi jaw gominning jinayitining éghirliqigha qarimay, uning öz qilmishini iqrar qilish we bashqilarning jinayi qilmishlirini masliship pash qilip xizmet körsetkenliki hem érishken mal-mülük we pullarni qayturup bergenliki üchün uninggha yéniklitip jaza bergen.

Jaw gomin 2004-yilidin kéyin, sabiq partkom sékrétari wang léchüen dewride Uyghur aptonom rayonluq namratlarni yölesh ishxanisining mudiri we sékrétarliq wezipisige teyinlinip, bu xizmetni taki 2015-yili, tekshürüsh astigha élin'ghuche atqurghan.

Xewerlerdin melum bolushiche, shi jinping hakimiyetni igiligendin buyan bashqa ölkilerdikige oxshash, Uyghur diyaridimu arqimu-arqidin bir qisim nazir, mu'awin nazir, bashqarma, bölüm we yéza, kent bashliqi derijilik kadirlar chiriklik qilmishliri sewebidin jazalan'ghan bolup, bularning ichide Uyghurlardin aptonom rayonluq hökümetning bash katipi alimjan memtiminmu bar.

Uchurlardin melum bolushiche we közetküchilerning qarishiche, jazalan'ghan xitay kadirlirining köpinchisi parixorluq bilen munasiwetlik bolsimu, emma bir qisim Uyghur kadirlirining jazalinishida ulardiki milliy tuyghu we siyasiy mewqe asas seweb bolghanliqi tehlil qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet