Уйғур елида йәнә бир қисим әмәлдарлар парихорлуқ қилғанлиқи үчүн җазаланди

Мухбиримиз ирадә
2015-10-15
Share

Үрүмчи шәһәрлик телевизийә истансиниң сабиқ башлиқи йин бавлуң парихорлуқ җинайити билән 9 йиллиқ муддәтлик қамақ җазасиға һөкүм қилинған.

Бу һәқтә тәңритағ хәвәрлиридә берилгән хәвәрдин қариғанда, бу йил 52 яшқа киргән йин бавлуң өткән йили 10-айниң 23-күни парихорлуққа четилип қолға елинған. Бу йил 8-айда вә ахирқи қетим 14-өктәбир күнидә ечилған сотларда униң хизмитидин пайдилинип, қанунсиз мал-дуня йиғқанлиқи муәййәнләштүрүлгән вә 9 йиллиқ қамақ җазасиға һөкүм қилинған. У қобул қилған мал-мүлкиниң омумий қиммити 3 милйон 480 миң сом хәлқ пули вә 20 миң долларға йетидикән.

Буниңдин сирт йәнә, уйғур елида турушлуқ ишләпчиқириш-қурулуш армийиси биңтуәнниң бир нәпәр әмәлдари оғлиниң тойида һәшәмәтчилик қилғанлиқи үчүн интизам җазаси алған. Җуңго хәвәрләр ториниң хәвиридә ейтилишичә, бу әмәлдар биңтуәнгә қарашлиқ 87-полк парткоминиң даимий әзаси, муавин полк башлиқи хе шя болуп, униң бу һәшәмәтчилики җәмийәттә интайин начар инкас пәйда қилған. Хәвәрдә йәнә, бу йилниң бешидин башлап интизам тәкшүрүш комитетиниң мушуниңға охшаш җәмийәттә тәсири яхши болмиған бир қисим әмәлдарларни бир тәрәп қилғанлиқи йезилған.

Хитай мәркизи һөкүмити уйғур елиға йеқинда мәхсус өмәк әвәтип, интизам тәкшүрүшни башлиғандин буян нурғун хитай әмәлдарлири җазаланди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт