Xitay en'gliyedin 50 neper parixor emeldarni qayturup bérishni telep qildi

Xitay en'gliyedin en'gliyede ikenliki éniqlan'ghan 50 neper parixor emeldarni xitaygha qayturup bérishni telep qildi.

En'gliye b b s agéntliqining xewiridin melum bolushiche, xitay da'iriliri en'gliye hökümitige 50 kishining tizimlikini bérip, tizimliktikilerning ilgiri xitayda hökümet emeldari bolup turghan mezgilide iqtisadiy jinayet ötküzgen emeldarlar ikenlikini bildürüp, ularni xitaygha qayturup bérishni telep qilghan. Buningdin sel ilgiri xitay hökümiti amérikighimu xitayda parixorloq bilen eyiblinip tutush buyruqi chiqirilghan 150 neper sabiq xitay emeldarlirining tizimlikini bérip, tizimliktiki kishilerni xitaygha qayturup bérishni telep qilghan.

Xitay jama'et xewpsizliki ministirliqining bu yil 8-yanwar élan qilghan doklatidin melum bolushiche, bultur xitayda bashlan'ghan “Parixor emeldarlargha zerbe bérish” herikitide, 2014-yil 12-ayning 31-künige qeder chet'ellerdin qayturup kélin'gen xitay emeldarlirining sani 680 ge yetken. Ulardin 390 nepiri özini melum qilip özlükidin qaytip kelgen, 290 nepiri xelq'ara saqchilarning hemkarliqida tutup xitaygha qayturup kélin'gen. Xitay xewiride yene, bu emeldarlardin 117 nepirining uzun yillardin buyan chet'ellerde qéchip yürgendin kéyin tutup kélin'gen parixor emeldarlar ikenliki alahide eskertilgen.