Xitay musteqil pelestin dölitini qollaydighanliqini élan qildi

Muxbirimiz erkin
2017-12-15
Élxet
Pikir
Share
Print

Xitay hökümiti bügün bayanat élan qilip, 1967‏-yildin burunqi chégra asasidiki musteqil pelestin dölitini qollaydighanliqini jakarlidi.

Xitay hökümitining bayanati "Dunya islam hemkarliq teshkilati" gha eza musulman döletler charshenbe küni türkiyening istanbul shehiride yighin échip, sherqiy yérusalémni pelestin dölitining paytexti dep jakarlighandin kéyin élan qilin'ghan.

3 Kün awwal échilghan bu yighinda dunyadiki 60 tek islam dölitining rehbiri we wekilliri ortaq xitabname élan qilghan. Ular birdek amérika prézidénti trampning yérusalémni isra'iliyening paytexti dep élan qilishini étirap qilmaydighanliqi, xelq'ara jama'etning sherqiy yérusalémni pelestin dölitining paytexti, dep étirap qilishini telep qilghan.

Prézidént tramp 6‏-dékabir küni élan qilghan bayanatida, "Isra'iliye bashqa herqandaq bir igilik hoquqluq döletke oxshash özining paytextini békitish hoquqigha ige. Buni qobul qilish tinchliqni emelge ashurushning zörür sherti," dégen idi. Biraq istanbulgha toplan'ghan islam döletliri prézidént trapmning qarari b d t ning 1980-yili chiqarghan yérusalém shehirining orni heqqidiki qararigha xilap ikenlikini ilgiri sürgen.

Xitay tashqi ishlar ministirliqining bayanatchisi lü kang jüme künlük axbarat élan qilish yighinida "Xitay islam ellirining yérusalémning orni mesilisidiki endishilirini chüshinidu. B d t ning yérusalémning orni heqqidiki qarari we bu mesilidiki xelq'ara pikir birlikini qollaydu," dégen. Közetküchilerning ilgiri sürüshiche, xitay mezkur bayanati arqiliq amérika bilen islam döletlirining otturisidiki ixtilaptin paydilinip, ular bilen téximu yéqin munasiwet qurushni, sherqiy türkistan mesiliside ularning téximu aktip yardimige érishishni közlimektiken.

Toluq bet