Уйғур елидә пикир әркинлики вә интернет-учур әркинлики илгириләп қамал қилинидиған йеңи қарарлар елинди

Мухбиримиз ирадә
2016-10-13
Елхәт
Пикир
Share
Принт

Уйғур аптоном райони даирилири интернет вә учур ториға қаратқан қамални йәниму күчәйтиш һәққидә қарар алған. Тәңритағ торида берилгән хәвәрдин мәлум болушичә, чаршәнбә күни ечилған «тор бихәтәрлики вә учурлаштуруш партийә хизмити комитети телевизийә-телефон йиғини» да уйғур елидики интернет -учур алақә васитилири вә тор бәтләргә қаритилған башқурушни қаттиқ күчәйтиш, торда елан қилиниватқан мәзмунларни башқуруш, өз намини қоллинишни толуқ ишқа ашуруш вә қаидигә хилаплиқ қилғанларни қаттиқ җазалаш қарар қилинған.

Хәвәрдә көрситилишичә йиғинда йәнә мунулар тәләп қилинған: «... Даириләр торда җиддий бир тәрәп қилиш хизмитини күчәйтип, шинҗаңға четилидиған тор җамаәт пикри, болупму зор сәзгүр, туюқсиз йүз бәргән җамаәт пикри әһвалини байқаш, бир тәрәп қилиш вә йетәкләш күчини һәқиқий өстүрүш; тордин пайдилинип мәхпийәтликни ашкарилаш, питнә-иғва тоқуш, тарқитиш, иғвагәрчилик, террорлуқ, иҗтимаий муқимлиққа четилидиған, җәмийәттә вәһимә пәйда қилидиған учурларни өз мәйличә тарқатқанларни қанун бойичә тәкшүрүп бир тәрәп қилиш керәк. Диний әсәбийлик идийәсини тарқатқан вә зораванлиқ, террорлуқ һәрикитигә күшкүрткән җинайәтчи унсурлар, шайка тәшкиллигәнләр вә нуқтилиқ адәмләргә қанун бойичә қаттиқ зәрбә бериш керәк».

Йиғинда йәнә, бундин кейин уйғур районидики тор бекәтләр чоқум партийә ячейкиси вә партгурупписи қуруп, тор бәтләрни партийә башқуруш низамнамиси бойичә башқуруши керәк икән.

Хәлқара кишилик һоқуқ органлири хитай һөкүмитини уйғур елидики пикир әркинлики, интернет-учур әркинликини қаттиқ бесим астиға елиш билән тәнқид қилип кәлгән. Бирақ, юқиридики йиғинда елинған қарарлар хитай һөкүмитиниң уйғур елидики қамалини зор дәриҗидә күчәйтидиғанлиқидин дерәк бәрмәктә.

Пикирләр (0)
Share
Толуқ бәт