Uyghur élide pikir erkinliki we intérnét-uchur erkinliki ilgirilep qamal qilinidighan yéngi qararlar élindi

Muxbirimiz irade
2016-10-13
Élxet
Pikir
Share
Print

Uyghur aptonom rayoni da'iriliri intérnét we uchur torigha qaratqan qamalni yenimu kücheytish heqqide qarar alghan. Tengritagh torida bérilgen xewerdin melum bolushiche, charshenbe küni échilghan "Tor bixeterliki we uchurlashturush partiye xizmiti komitéti téléwiziye-téléfon yighini" da Uyghur élidiki intérnét -uchur alaqe wasitiliri we tor betlerge qaritilghan bashqurushni qattiq kücheytish, torda élan qiliniwatqan mezmunlarni bashqurush, öz namini qollinishni toluq ishqa ashurush we qa'idige xilapliq qilghanlarni qattiq jazalash qarar qilin'ghan.

Xewerde körsitilishiche yighinda yene munular telep qilin'ghan: "... Da'iriler torda jiddiy bir terep qilish xizmitini kücheytip, shinjanggha chétilidighan tor jama'et pikri, bolupmu zor sezgür, tuyuqsiz yüz bergen jama'et pikri ehwalini bayqash, bir terep qilish we yéteklesh küchini heqiqiy östürüsh؛ tordin paydilinip mexpiyetlikni ashkarilash, pitne-ighwa toqush, tarqitish, ighwagerchilik, térrorluq, ijtima'iy muqimliqqa chétilidighan, jem'iyette wehime peyda qilidighan uchurlarni öz meyliche tarqatqanlarni qanun boyiche tekshürüp bir terep qilish kérek. Diniy esebiylik idiyesini tarqatqan we zorawanliq, térrorluq herikitige küshkürtken jinayetchi unsurlar, shayka teshkilligenler we nuqtiliq ademlerge qanun boyiche qattiq zerbe bérish kérek".

Yighinda yene, bundin kéyin Uyghur rayonidiki tor béketler choqum partiye yachéykisi we partguruppisi qurup, tor betlerni partiye bashqurush nizamnamisi boyiche bashqurushi kérek iken.

Xelq'ara kishilik hoquq organliri xitay hökümitini Uyghur élidiki pikir erkinliki, intérnét-uchur erkinlikini qattiq bésim astigha élish bilen tenqid qilip kelgen. Biraq, yuqiridiki yighinda élin'ghan qararlar xitay hökümitining Uyghur élidiki qamalini zor derijide kücheytidighanliqidin dérek bermekte.

Toluq bet