Уйғурлар диярида пиланлиқ туғут йеңи сиясити йолға қоюлди

Мухбиримиз әзиз
2017-08-01
Share

Уйғурлар диярида йиллардин буян иҗра болуп келиватқан "пиланлиқ туғут сиясити" дә шәһәрләрдики уйғур аилилири икки пәрзәнтлик, хитайлар бир пәрзәнтлик болуш бәлгиләнгән болуп, өткән җүмә күнидин башлап иҗра болушқа башлиған йеңи сиясәт бойичә, хитай болмиған милләтләргә берилгән етибар сиясити бикар қилинған.

Хитайниң "йәр шари вақит гезити"дә берилгән бу һәқтики хәвәрдә ейтилишичә, йеңи сиясәт бойичә буниңдин кейин миллий тәркибиниң қандақ болушидин қәтийнәзәр шәһәр нопусидики бир җүпниң икки пәрзәнтлик, йеза нопусидикиләрниң үч пәрзәнтлик болушиға рухсәт қилинидикән. Хитай һөкүмитиниң алақидар әмәлдарлири бу һәқтә сөз қилип "бу йеңи сиясәт һәрқайси милләтләрниң һоқуқта баравәр болидиғанлиқини йәнә бир қетим әкс әттүрүп бәрди" дегән.

Мәлум болушичә хитайниң "нур гезити" дә 2015-йили елан қилинған бир парчә мақалида бу һәқтики мәсилиләр муһакимә қилинип "аптономийә бирла милләтниң аптономийиси әмәс, аптономийәлик районға бирла милләт игидарчилиқ қилидиған иш йоқ" дәп алаһидә көрсәткән иди.

Анализчилар бу йеңи сиясәтниң иҗра қилинишини "йәрлик милләтләргә берилгән аптономийә һоқуқиниң бикар қилинишқа башлиғанлиқиниң ипадиси, буниң билән уйғур район тәвәсидики хитай көчмәнлириниң нопус сани тездин көпийип, йәрлик милләтләрниң санидин ешип кетишигә йол ачқанлиқ" дейишмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт