Майк помпейо әркин асия радийоси уйғур бөлүминиң хизмитигә юқири баһа бәрди

Мухбиримиз әркин
2021-01-11
Share
Майк помпейо әркин асия радийоси уйғур бөлүминиң хизмитигә юқири баһа бәрди Америка ташқи ишлар министири майк помпейо таратқуларға сөз қилди. 2020-Йили 24-ноябир, вашингтон.
REUTERS

Америка ташқи ишлар министири майк помпейо 11-январ күни әркин асия радийоси уйғур бөлүминиң хизмитигә интайин юқири баһа бәрди. У, әркин асия радийоси уйғур бөлүминиң хизмити җасарәт тәләп қилиду, дәп көрсәтти.

Помпейо бу сөзләрни трамп һөкүмитиниң ташқи сиясити, "америка авази" радийосиниң вәзиписи, униң хитай, иранға охшаш диктатур дөләтләрдики хәлқләрниң авазини намаян қилиш җәһәттики роли тоғрисида "америка авази" радийосида сөзлигән нутуқида тилға алди.

У мундақ деди: "мән бу йәрдики башқа радийоларғиму һөрмитимни билдүримән. Дунядики уйғур тилида берилидиған бирдин-бир аңлитиш әркин асия радийосиниң қармиқида тарқитилиду. Силәр аңлашни халайдиған барлиқ кишиләргә хитай компартийәсиниң шинҗаңда өз пуқралириға қарши садир қиливатқан вәһшиликлирини аңлаттиңлар. Әлвәттә бу һәқиқәтни, бу әсирниң йүзигә чүшкән дағни аңлашни халимайдиғанларму болди. Хитай компартийәси әркин асия радийосиниң аз дегәндә 6 нәпәр мухбириниң аилә тавабиатлирини шинҗаңдики лагерларға қамап тәһдит салған вә тәһдит селишни давамлаштуруп кәлгән болсиму, бирақ силәр өз хизмитиңларни давамлаштуруп кәлдиңлар. Хизмитиңлар җасарәт тәләп қилиду."

Помпейо әркин асия радийоси уйғур бөлүминиң хизмитини муәйәнләштуруш билән бир вақитта "америка авази" радийосиниң хитай қатарлиқ дөләтләрдин хизмәтчиләрни көпләп қобул қилғанлиқи, бир мәзгил өзиниң вәзиписини унтуп, хәвәрлириниң американиң кәмчилликлиригила мәркәзлишип қалғанлиқини илгири суруп: "силәрниң вәзипәңлар дуняда демократийә, әркинлик вә америка қиммәт қаришини алға сүрүштур," деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт