Хитай һөкүмитиниң "помпйони әйибләш һәрикити" ниң сирлири ечилишқа башлиди

Мухбиримиз әзиз
2021-05-20
Share

Америка һөкүмитиниң сабиқ ташқи ишлар министири майк помпйео 2021-йили вәзиписидин айрилиш һарписида "хитай һөкүмитиниң уйғурларға қиливатқанлирини биз ирқий қирғинчилиқ, дәп қараймиз" дәп җакарлиғаниди. Шуниңдин узун өтмәйла уйғур дияридики ашпәз-навайлардин тартип дөләт кадирлириғичә нәччә онлиған "хәлқ вәкиллири" видийо арқилиқ "майк помпейониң билҗирлашлирини әйибләш" темисида "помпеони әйибләш долқуни" ни қозғиди.

Ташқи дунядики хәвәр мәнбәсини көрүш шараитиға игә болмиған һәмдә майк помпейониң инглизчә сөзлирини чүшәнгидәк маарип тәрбийәси көрмигән бунчә көп кишиниң бирла вақитта тушмутуштин майк помпейони әйибләп өзлириниң қандақ "бәхтияр" турмуш кәчүрүватқанлиқини тәкитлиши муһаҗирәттики уйғурлар һәйран қалидиған ишлар әмәс иди. Әмма ғәрб дунясидики кишиләр үчүн чүшиниксиз болған бу һадисиниң сири бирләшмә агентлиқниң мухбири дейк каң ишлигән мәхсус хәвәрдә тәпсилий баян қилинди.

20-Май елан қилинған бу һәқтики тәпсилий хәвәрдә ейтилишичә, бирләшмә агентлиқ бу һәқтики бир язма уқтурушни қолға чүшүргән. Қарамай шәһәрлик һөкүмәт ишханисиға әвәтилгән бу уқтурушта һәр бир ишхана хитайчә сөзлийәләйдиған бир уйғурни тепиш һәмдә бир минутлуқ видийода помпейониң хитайға қарши сөзлиригә "рәддийә бериш" кә буйрулған. Уқтурушта ениқ қилип "сөзлигүчи җәзмән помпйониң сөзлиригә қәтий қарши туридиғанлиқини, өзиниң буниңдин бәкму ғәзәпләнгәнликини билдүрүши, шундақла компартийәни вә җуңхуа дөлитини қизғин сөйидиғанлиқини тәкитлиши лазим" дейилгән. Буниң билән нурғун уйғурлар бу хил бюрократлиқниң қурбаниға айлинип, видийо арқилиқ майк помпеони әйибләшкә мәҗбур қилинған.

Хәвәрдә ейтилишичә, мәзкур уқтурушни рәсимгә тартип бирләшмә агентлиққа әвәтип бәргән киши чен хавйү исимлик бир арилашма қанлиқ хитай яш болуп, уни достлири "фирдәвс" дегән уйғурчә исми билән чақиридикән. У бу ‍уқтурушни йоллап икки күндин кейин қолға елинған. Бирләшмә агентлиқниң мухбирлири буни сүрүштә қилғанда сақчилардин "чен хавйү ялған учур тарқатқанлиқи вә кишиләрни қаймуқтуруп бөлгүнчиликни тәрғиб қилғанлиқи үчүн қолға елинди" дегән җавабқа еришкән. Уйғурчә, хитайчә, инглизчә қатарлиқ алтә-йәттә хил тил билидиған бу яшниң достлиридин бири "фирдәвс шинҗаңниң мустәқиллиқини қоллимайтти. Бөлгүнчилик һәққидиму сөз қилип баққанлиқини аңлимиғанмиз. Униң пәқәт америкаға берип докторлуқта оқуш арзуси бар иди" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт