Mayk pompéyo: "Xitay gherb démokratiyesi we qimmet qarishini weyran qilishqa niyet baghlidi"

Muxbirimiz erkin
2020-06-01
Élxet
Pikir
Share
Print

Amérika tashqi ishlar ministiri mayk pompéyo xitayning gherb idé'ologiyesi, démokratiyesi we qimmet qarishini weyran qilish niyitige kelgenliki, uning amérikaliqlarni xeterge ittiriwatqanliqini bildürdi. Bu mayk pompéyoning hazirgha qeder xitaygha qarita qilghan éniq we keskin tenqidlirining biridur. U bu sözlerni 31-may yekshenbe küni "Foks xewerliri" qanilining muxbiri mariya bartimoraning ziyaritini qobul qilghanda tekitligen. Bu uning amérika prézidénti donald tramp ötken jüme küni xitaygha qarita alghan bezi qararlirini élan qilghandin kéyin tunji qétim xitay heqqide toxtilishidur.

Mayk pompéyoning bildürüshiche, nöwette xitay saxta uchur tarqitish, pütün dunyada qalaymiqanchiliq peyda qilishta "Téximu zorawanlashmaqtiken". U: "Hazirqi xitay kompartiyesi buningdin 10 yil burunqidin pütünley perqlinidu", "Hazirqi kompartiye özini gherb idé'ologiyesi, gherb démokratiyesi, gherb qimmet qarishini weyran qilishqa niyet baghlighan kompartiyedur. U amérikaliqlarni xeterge ittermekte" dégen.

Pompéyoning tekitlishiche, xitayning tehditi uning eqliy mülk oghriliqi, korona wirusi yuqumi mezgilidiki diqqetni burashqa urunushi, xongkongni kontrol qilishni kücheytishi qatarliq jehetlerde ipadilenmektiken. Amérika prézidénti donald tramp ötken jüme küni dunya sehiye teshkilatidin chékinip chiqqanliqi we xitayning xongkong bixeterlik qanunini chiqirishi seweblik xongkongning alahide imtiyazliq ornini bikar qilidighanliqini jakalighanidi.

Toluq bet