Mayk pompéyo Uyghur diyaridiki kishilik hoquq depsendichilirini jazalashni alqishlidi

Amérika maliye ministirliqi 31-iyul küni Uyghurlar diyaridiki siyasiy basturush we kishilik hoquq depsendichilikige chétishliq, dégen eyib bilen atalmish “Shinjang ishlepchiqirish we qurulush bingtu'eni” ning ilgiriki we hazirqi rehberlirini “Yershari magintiski qanuni” boyiche jazalighanliqini élan qilghanidi. Amérika tashqi ishlar ministiri mayk pompéyo bu xewerdin kéyin derhal bu heqte ashkara bayanat élan qilip, özining bu qararni qizghin alqishlaydighanliqini bildürdi.

Amérika tashqi ishlar ministirliqining tor bétide élan qilin'ghan bayanatta mayk pompéyo “Xitay kompartiyesining shinjangdiki Uyghurlargha we bashqa musulmanlargha qarshi ijra qiliwatqan kishilik hoquq depsendichilikini mushu esirning yüzige chüshken dagh, déyishke bolidu. Tramp hökümiti xitay hökümitining zulum, zor tutqun, yuqiri pen-téxnikiliq nazaret, mejburiy emgek we mejburiy nopus kontrolluqi qatarliq bir qatar qilmishlirigha qarshi dunyawi tirishchanliqqa yétekchilik qilip keldi. Biz bu prinsipal heriketni dawam qildurmaqchimiz” dédi.

Bayanatta 2020-yili 9-iyulda amérika hökümitining Uyghurlar diyaridiki birinchi nomurluq emeldar, shundaqla “Bingtu'en” ning birinchi siyasiy komissari chén chu'en'goni “Qara tizimlik” ke kirgüzgenliki, Uyghurlarni basturushta “Bingtu'en” ning biwasite jawabkarliqi bolghanliqi üchün emdilikte “Bingtu'en” ning hemde uning ilgiriki we hazirqi rehberliriningmu bu tizimlikke kirgüzülgenliki alahide tekitlinidu.

Mayk pompéyo bayanatning axirida dunyadiki barliq döletlerni xitay kompartiyesining barghanséri yuqiri pellige chiqiwatqan depsendichilik qilmishlirini eyibleshke, shundaqla özlirining heqqaniyet sépige qétilishqa chaqirdi.