Майк помпейо: «чәтәл һөкүмәтлириниң ақиллар мәркизигә тәсир көрситишини чәкләймиз!»

Мухбиримиз әзиз
2020-10-13
Елхәт
Пикир
Share
Принт

Америка ташқи ишлар министири майк помпйо 13-өктәбир күни қилған сөзидә америка туприқидики ақиллар мәркәзлиригә чәтәл һөкүмәтлириниң иқтисадий ярдәм бериш һәмдә шу арқилиқ өз тәсирини сиңдүрүш һәрикәтлиригә чәк қойидиғанлиқини билдүрди. «Дөләтлик баһа» гезитиниң 12-өктәбирдики саниға бесилған хәвәрдә ейтилишичә, майк помпейо бу мәсилиниң аллиқачан еғир бир сәвийигә берип қалғанлиқини билдүргән.

Хәвәрдә ейтилишичә, майк помпейо бу һәқтики язма баянатида «ташқи ишлар министирлиқимиз билән алақидә болушни истигән һәрқандақ ақиллар мәркизи өзлиригә чәтәл һөкүмәтлиридин ианә қилинған мәбләғниң тәпсилатини өз тор бәтлиридә елан қилиши лазим» дегән.

Мәлум болушичә, бир қисим чәтәл һөкүмәтлири америкадики ақиллар мәркизиниң иқтисадий җәһәттики қийинчилиқлириға «мәрдләрчә» ярдәм бериш бәдилигә бу мәркәзләр арқилиқ америка җамаити арисида өзлириниң тәсирини кеңәйтишкә урунмақтикән. Түркийә һөкүмитиниң иқтисадий ярдимигә еришкән «атлантик кеңиши» ақиллар мәркизи бу йил авғуст ейидики бир қетимлиқ аммиви муһакимә йиғинида әрдоған һөкүмитиниң буйруқи бойичә бәзи мутәхәссисләрниң муһакимә йиғинида сөз қилиш һоқуқини бикар қиливәткән.

Хәвәрдә ейтилишичә, чәтәл һөкүмәтлириниң бу хилдики «иқтисадий ярдәм» арқилиқ америка туприқидики ақиллар мәркизини өз зуваниға айландуруш урунуши пикир әркинликини боғқанлиққа баравәр болуп, хитай вә русийә һөкүмәтлириниң мушуниңға охшап кетидиған паалийәтлири йеқиндин буян көпийип маңмақтикән.

Пикирләр (0)
Share
Толуқ бәт