Майк помпейо: «хитайниң уйғурларға қиливатқанлири 21-әсирниң йүзигә чүшкән дағ!»

Мухбиримиз әзиз
2019-07-18
Елхәт
Пикир
Share
Принт

Америка ташқи ишлар министири майк помпейо 18-июл күни хитай һөкүмитиниң уйғурларни бастуруш сиясәтлирини қаттиқ әйиблиди һәмдә «заманимиздики кишилик һоқуқ дәпсәндичиликидә хитай әң алдинқи орунда туриду. Хитай һөкүмитиниң уйғурларға қиливатқанлири биз яшаватқан 21-әсирниң йүзигә чүшкән бир дағ» дәп көрсәтти.

Ройтерс агентлиқиниң 18-июлдики хәвиридә ейтилишичә, майк помпйео вашингтон шәһиридә ечилған «диний етиқад әркинликини алға сүрүш хәлқара йиғини» мәзгилидә хитай һөкүмитиниң бу йиғинға тәклип қилинған бир қисим дөләтләрни йиғинға бармаслиққа қистиғанлиқини әйибләп, юқириқи сөзни қилған.

Хәвәрдә майк помпейониң бу сөзи америка президенти доналд трамп диний етиқад әркинлики җәһәттә зиянкәшликкә учриған бир қисим дөләт вә районлардики хәлқләрниң вәкиллири билән 17-июл күни ақ сарайда көрүшкәндин кейин оттуриға чиққанлиқи, ақ сарайниң нөвәттә уйғурлар дияридики сиясий бастурушқа мәсул бир қисим хитай әмәлдарлириға җаза қоллинишни ойлишиватқанлиқи алаһидә тәкитлиниду.

Пикирләр (0)
Share
Толуқ бәт