Amérika tashqi ishlar ministiri mayk pompéyo: “Biz xitaygha taqabil turushimiz kérek!”

Muxbirimiz irade
2019.10.31
Share on WhatsApp
Share on WhatsApp

Amérika tashqi ishlar ministiri mayk pompéyo 30-öktebir küni qilghan bir sözide: “Xitay dunyani kontrol astigha élish üchün heriket qiliwatidu. Biz buninggha choqum taqabil turushimiz kérek,” dégen.

U yuqiriqi sözlerni amérikadiki nopuzluq tetqiqat organliridin bolghan “Xudson instituti” teripidin uyushturulghan bir ziyapette sözligen nutqida éytqan.

U mundaq dégen: “Ular (xitay kompartiyesi) amérika we dunyagha qarshi tedbirlerni ishqa sélip, riqabet teshkil qiliwatidu. Biz hemmimiz bu riqabetke ortaq qarshi turushimiz kérek. . . Ikki dölet sistémisidiki négizlik perqlerni we uning amérikaning dölet bixeterlikige körsitiwatqan tesirlirini körmeske sélish réyalliqtin tolimu uzaqlashqanliq bolidu.”

Tashqi ishlar ministiri mayk pompéyo shu kündiki sözide yene töwendikilerni bayan qilghan: “Biz xitayning tereqqiyatini pütün küchimiz bilen qollap, ularning bu arqiliq erkin döletke aylinishini ümid qilghan iduq. Eksiche xitay kompartiyesi bizning bu yaxshi niyitimizni suyi'istémal qildi. Hazir prézidént donald tramp xitay kompartiyesining amérika we amérikaning qimmet qarashlirigha qiliwatqan öchmenlikidin ibaret bu réyalliq bilen yüzleshmekte. Biz xitay bilen mu'amile qilghanda arzuyimizdiki xitay bilen emes, emeliyettiki xitay qandaq bolsa shu boyiche mu'amile qilishimiz kérek.”

Tashqi ishlar ministiri mayk pompéyo yuqiriqi sözlerni özining tiwittérdiki resmiy hésabi arqiliq yene bir qétim tekitlidi. Amérika tashqi ishlar ministirliqimu bügünki tiwittér uchurlirida uning bu sözlirini tarqatti.

Yéqinda amérikaning mu'awin prézidénti mayk pensmu “Wilson merkizi” de söz qilghanda “Amérika hökümiti xitaygha qaratqan siyasetliride dawamliq halda hemkarlishish terepdari bolup kelgen bolsimu, emma xitay hökümiti buninggha téxnika oghriliqi, tijaret tengsizliki qatarliq uyghun bolmighan heriketler bilen jawab qayturdi. Biraq bu tarix emdi ayaghlashti,” dep eskertken.

Melum bolushiche, amérikaning yuqiri derijilik emeldarlirining xitay heqqidiki bayanliri amérikaning xitaygha qaratqan siyasetliridiki zor özgirishtin dérek béridiken.

Xitay terep amérika tashqi ishlar ministirining sözliridin qattiq narazi bolghan. Xitay tashqi ishlar ministirliqining bayanatchisi géng shu'ang 31-öktebir küni buninggha inkas qayturup: “Uning bu sözliri amérikadiki bir qisim siyasetchilerning kompartiyege qarshi idiyesini ipadilep béridu. Ular bizning partiye we hökümitimizge hujum qilip, bizning ichki we tashqi siyasetlirimizge qara chaplawatidu,” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.