Майк помпейо уйғурлар мәсилисидә көкрәк керип оттуриға чиққан мәсут өзилни алқишлиди

Мухбиримиз әзиз
2019-12-17
Share

Германийәдики түркийә муһаҗири аилисидә туғулған шундақла дуняға даңлиқ путбол чолпини мәсут өзилниң уйғурлар дуч келиватқан зулум һәққидә хитайни һәмдә ислам дунясини қаттиқ әйиблиши хәлқарада зор бәс-муназиригә сәвәб болди.

Мәсутниң шәрқий түркистан байриқи билән бирликтә чиқарған кәскин тәнқид ибариси хитай һөкүмитиниму қаттиқ биарам қилған. Болупму мәсутниң хитайдики миңлиған путбол һәвәскарлири дәрһалла уни кәскин әйибләп, "террорчиларға һесдашлиқ қиливатиду" дегән. Мәсутниң хитайдики төт милйондин көпрәк мәстаниси дәрһалла у топ тепиватқан "арсенал" командисиниң барлиқ мусабиқилирини хитайда мәни қилиш һәққидә чақириқларни оттуриға қойған. Хитай һөкүмитиму баянат елан қилип, уни "дуняви җиһад қозғашқа қутратқулуқ қиливатиду," дәп әйиблигән.

Әнә шундақ бир вәзийәттә америка ташқи ишлар министирлиқиниң министири майк помпейо 17-декабир күни өзиниң тиветтер бетидә учур йоллап мәсут өзилни һәмдә униң һәққанийәтни қоллаш җасаритини қоллайдиғанлиқини билдүргән. У  бу һәқтики учурида "хитай компартийәси өз тәшвиқат васитилиридә мәсут өзил һәмдә ‹арсенал' командисиниң намлирини ‹қара тизимлик' кә киргүзүп қоялиши мумкин. Әмма улар һәқиқәтни йепишқа илаҗсиз," деди. Шуниңдәк хитай һөкүмитиниң бу хил ашкара шәкил алған һәмдә уйғурларни нишан қилған бастуруш һәрикитини һәрқанчә қилипму дунядин йошуруп қалалмайдиғанлиқини алаһидә тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт