Putin rusiyening amérika bilen hemkarlishidighanliqini bildürdi

Rusiye prézidénti putin shenbe küni rusiye 1 - qanal téléwiziyesi muxbirining ziyaritini qobul qilghanda rusiyening ortaq köngül bölidighan mesililerde amérika bilen hemkarlishishi zörür ikenlikini bildürdi.

Roytérsning xewer qilishiche, rusiye prézidénti wladimir putin xelqara sehnide rusiye bile amérikining bir qatar mesililerde pikir ixtilap bar bolsimu, emma yenila köp jehetlerde ortaq menpe'etliri barliqini tekitlidi.

Wladimir putin özining ilgiriki sözliride da'im amérika we gherbni qattiq tenqid qilghan hemde gherbni siyasiy öktichilerni qollash we ukra'ina kirizisidin paydilinish arqiliq siyasiy jehettin özgertish élip barmaqchi ikenlikini eyibligen idi. Biraq, uning bu qétimqi sözide ilgiriki qattiqliqida özgirish yüz bergenliki melum.

Putin sözide amérika bilen rusiyining ortaq menpe'etliri qatarigha qirghuchi qorallarni kéngeytmeslik, teshkillik jinayetchilik we térrorchiliqqa zerbe bérish hemde kembighelchilikni axirlashturush kiridighanliqini eskertti.

Halbuki, putin téxi peyshenbe küni sözligen nuqtida amérikini xelqara sehnide üstünlük igilimekchi, dep eyibligen idi.

2014 - Yili 3 - ayda rusiye qirimni qoshuwalghandin kéyin ukra'ina krizisi ötkürleshken we rusiyede gherbke qarshiliq kücheygen idi. Amérika we yawropa ittipaqi bir qanche qétim rusiyege qarita iqtisadiy imbargo qollan'ghan bolup, gherb rusiyeni sherqiy ukra'ina chégrisidiki qoshunlirini élip kétish shuningdek rusiyeperes küchlerni qoral - yaraq hem adem küchi bilen teminleshni toxtitishqa chaqirghan, emma, rusiye izchil buni ret qilghan idi. Lékin, sherqiy ukra'ina weziyitining yenila jiddiy ikenliki shuningdek iqtisadiy imbargolar tüpeylidin rusiye iqtisadining qiyinchiliqlargha duch kéliwatqanliqi we rusiyening xelq'ara sehnide yétim qélish weziyiti yenila mewjutluqi bildürülmekte.