Rusiye prézidénti putin xitayni ziyaret qilidu

Muxbirimiz ümidwar
2014-05-18
Share


Rusiye prézidénti wladimir putin 20 - may küni xitayni ziyaret qilidu. Xitay dölet re'isi shi jinpingning teklipi boyiche xitayda dölet ishliri ziyaritide bolidighan wladimir putin shi jinping bilen birlikte shangxeyde bashlinidighan rusiye we xitay déngiz armiyilirning jenubiy déngizdiki birleshme manéwirining bashlinish murasimigha qatnishidu.

Rusiyening xewerler agéntliqining yézishiche, putin yene 21 - may küni asiyaning öz'ara hemkarliqi we ishenchisini ashurush namidiki dölet rehberliri yighinigha qatnishidu.

Xewerdin melum bolushiche, putin bu qétim rusiyening chong kölemlik bir wekiller omikini bashlap baridighan bolup, putinning bu sepiri jeryanida ikki dölet arisida énérgiye, soda iqtisad qatarliq köp saheler boyiche bir qatar kélishimler imzalinidu.

Putinning bu qétimqi ziyariti ukra'ina kirizisidin kéyin amérika we yawropa ittipaqining rusiyege qaratqan iqtisadiy imbargosigha taqabil turush xaraktérigha ige bolup, rusiyening gazprom shirkiti xitay bilen her yili 38 milyard kub métir tebi'iy gaz mangdurushni meqset qilidighan 30 yilliq kélishim imzalaydken.

Amérika awazining yézishiche putin bilen birge xitaygha baridighan wekillerning ichide amérika we yawropa ittipaqi imbargo qoyghan shexslermu bar.Shuningdek yene qirim rehbirimu bar bolup, qirim xitayning qirimning iqtisadiy tereqqiyatigha meblegh sélishini ümid qilidiken.

Seperning eng muhim nuqtisi rusiye bilen xitayning jenubiy déngiz rayonida birleshme manéwir ötküzüshige toghra kelgen bolup, bu manéwir amérikining tinch okyan rayondiki tesir küchining éshishigha qaritilghan dep hésablanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet