Rusiyede putinning qayta prézidént saylimigha qatnishishigha qarshi namayish ötküzüldi

Muxbirimiz ümidwar
2018-01-28
Share

Yekshenbe küni rusiyening moskwa we sankitpétérburg qatarliq chong-kichik sheherliride prézidént saylimigha naraziliq bildürüsh namayishi yüz bergen.

En'gliye b b s agéntliqining xewer qilishiche, öktichi alékséy nawalniyning chaqiriqi boyiche teshkillen'gen "Saylighuchilar ish tashlishi" dep atalghan moskwa we sankitpétérburgdiki namayishlarning kölimi bir qeder chong bolup, moskwa shehiridiki namayishta namayishchilar asasliqi twérskiy kochisi namliq chong kochida mangghan, öktichiler rehbiri alékséy nawalniy bu yergiche namayishchilar bilen birge bolghandin kéyin saqchilar teripidin tutup kétilgen.

Sankitpétérburgdiki namayishqimu ikki ming etrapida adem qatnashqan bolup, b b s agéntliqining yézishiche, bu qétimqi moskwa we sankitpétérburgdiki namayishta saqchilar namayishchilargha qarita ilgirikidek qopalliq qilmighan, yeni keng da'iride tutqun qilmighan. Emma namayish rusiyening her qaysi jayliridiki 118 chong-kichik sheherde yüzbergen bolup, asasliqi rusiyening bashqa sheherliridiki namayishta tutqun qilish éghir bolup, jem'iy 250 adem tutulghan. Rusiyening türkiy chuwash jumhuriyitining merkizi chéboksar bilen türkiy xelq - bashqurtlarning bashqurtistan jumhuriyiti paytexti ufa shehiridiki namayishta köprek adem tutqun qilin'ghan.

Namayishning tüp meqsiti putinning prézidént saylimigha qatnishishigha qarshi turush bolup, namayishchilar öktichi rehber alékséy nawalniyning hazirqi prézidént putinning bu yil 3-ayda yene prézidént saylimigha qatnishishigha qarshi turush idiyisini qollash yüzisidin bu namayishqa qatnashqan. Nawalniy qatarliq öktichiler rusiyediki emeldarlar qatlimidiki chiriklikke qarshi pa'aliyet qilmaqta.

Rusiyede bu yil 3-ayning 18-küni prézidént saylimi bolidighan bolup, putinning namzatliqi körsitilgen we uning qollighuchiliri uni rusiyening qeddini kötürgen, ukra'ina, süriye mesililiride rusiyening milliy menpe'etini qoghdighan dep medhiyelise, öktichiler uni mustebitlik qilmishi bilen, yeni öktichi, démokratik pikirlerge zerbe bérish qilmishi bilen eyiblimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet