Америка дөләт мәҗлиси әзалири америка һөкүмитиниң қачқун уйғурларға игә чиқишини тәләп қилди

Мухбиримиз әзиз
2022.02.02
Share on WhatsApp
Share on WhatsApp

Америка дөләт мәҗлиси қармиқидики “хитай ишлири иҗраийә комитети” ниң рәислири җеф мерклей вә җеймис мәкговерн 1-феврал күни америка ташқий ишлар министири антони блинкен әпәндигә очуқ мәктуп йоллиған. Мәктубта улар америка ташқий ишлар министирликиниң маракәш, сәуди әрәбистан вә қазақистандики уйғур вә қазақ қачқунлириниң панаһлиқ тиләш ишлириға дипломатийә җәһәттин қол тиқишини, шу арқилиқ уларниң хитайға қайтурулушиниң алдини елишни тәләп қилған.

Улар мәктубида: “панаһлиқ тилигүчиләрни мәҗбурий һалда хитайға қайтуруш хәлқара қанунға хилап. Шуниңдәк бу кишиләрни тутқун болуш, қийин-қистаққа дучар болуш вә башқа җисманий зиянкәшликкә учрашқа елип бариду,” дәп әскәрткән.

Мәктубта рәисләр маракәштә тутқун қилинған идрис һәсән, сәуди әрәбистанда тутқун қилинған һәмдулла абдувәли вә нурмәмәт рози қатарлиқларниң әһвалини мисал қилған һалда ташқий ишлар министири антони билинкенгә “ашу дөләтләрдики мунасивәтлик ишханилиримиз ашу панаһлиқ тилигүчиләрни қоғдаш мәҗбурийитини үстигә елиши лазим” дегән. Улар йәнә бу уйғур қачқунларниң әмәлийәттә һечқандақ җинайәт өткүзмигән кишиләр болсиму, әмма хитай һөкүмитиниң хәлқара дипломатийә саһәсигә бесим қилиш ‍арқилиқ уларни терорлуққа четишқа урунуватқанлиқини, илгириму мушу хил төһмәтләр билән сәуди әрәбистан, пакистан, мисир, тайланд вә малайсия қатарлиқ җайлардин хитайға қайтурулған уйғурларниң из-дерәксиз ғайип болғанлиқини алаһидә тәкитлигән.

Мәктубта улар маракәш қатарлиқ дөләтләрниң уйғур қачқунларни хитайға өткүзүп бериши хәлқара қанунларға хилап һалда йүз бериватқанда, америка һөкүмитиниң ашу җайлардики әлчихана вә консулханилириниң бу ишларға арилишиши һәмдә буни тосуп қелиши лазимлиқини күчлүк рәвиштә тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.