Amérika dölet mejlisi ezaliri amérika hökümitining qachqun Uyghurlargha ige chiqishini telep qildi

Amérika dölet mejlisi qarmiqidiki “Xitay ishliri ijra'iye komitéti” ning re'isliri jéf mérkléy we jéymis mekgowérn 1-féwral küni amérika tashqiy ishlar ministiri antoni blinkén ependige ochuq mektup yollighan. Mektubta ular amérika tashqiy ishlar ministirlikining marakesh, se'udi erebistan we qazaqistandiki Uyghur we qazaq qachqunlirining panahliq tilesh ishlirigha diplomatiye jehettin qol tiqishini, shu arqiliq ularning xitaygha qayturulushining aldini élishni telep qilghan.

Ular mektubida: “Panahliq tiligüchilerni mejburiy halda xitaygha qayturush xelq'ara qanun'gha xilap. Shuningdek bu kishilerni tutqun bolush, qiyin-qistaqqa duchar bolush we bashqa jismaniy ziyankeshlikke uchrashqa élip baridu,” dep eskertken.

Mektubta re'isler marakeshte tutqun qilin'ghan idris hesen, se'udi erebistanda tutqun qilin'ghan hemdulla abduweli we nurmemet rozi qatarliqlarning ehwalini misal qilghan halda tashqiy ishlar ministiri antoni bilinkén'ge “Ashu döletlerdiki munasiwetlik ishxanilirimiz ashu panahliq tiligüchilerni qoghdash mejburiyitini üstige élishi lazim” dégen. Ular yene bu Uyghur qachqunlarning emeliyette héchqandaq jinayet ötküzmigen kishiler bolsimu, emma xitay hökümitining xelq'ara diplomatiye sahesige bésim qilish ‍arqiliq ularni térorluqqa chétishqa urunuwatqanliqini, ilgirimu mushu xil töhmetler bilen se'udi erebistan, pakistan, misir, tayland we malaysiya qatarliq jaylardin xitaygha qayturulghan Uyghurlarning iz-déreksiz ghayip bolghanliqini alahide tekitligen.

Mektubta ular marakesh qatarliq döletlerning Uyghur qachqunlarni xitaygha ötküzüp bérishi xelq'ara qanunlargha xilap halda yüz bériwatqanda, amérika hökümitining ashu jaylardiki elchixana we konsulxanilirining bu ishlargha arilishishi hemde buni tosup qélishi lazimliqini küchlük rewishte telep qilghan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar