Хитай рәис ши җинпиң хитайниң бөлгүнчиликкә қарши “қанлиқ уруш” қилишқа тәйярлиқини билдүргән

Хитай дөләт рәиси ши җинпиң хитай хәлқ қурултийиниң йепилиш мурасимида қилған сөзидә хитайни бөлүшни мәқсәт қилған һәрқандақ бир һәрикәткә қарши “қанлиқ уруш” қилишқа тәйярлиқини билдүргән. Ши җинпиңниң юқиридики бу сөзи хәлқара мәтбуатларниң күчлүк диққитини қозғиди.

Б б с агентлиқиниң хәвиридә ейтилишичә, хитай дөләт рәиси ши җинпиң 13‏-қетимлиқ хитай хәлқ вәкилләр қурултийиниң 1‏- омумий йиғиниң йепилиш мурасимидики нутқида тәйвән вә хоңкоңни күчлүк рәвиштә агаһландуруп: “дөләтни бирликкә кәлтүрүшни әмәлгә ашуруш хитай хәлқиниң бирдәк арзуси. Уни бөлүшкә урунған һәрқандақ бир һәрикәт чоқум мәғлуп болиду” дегән.

Ши җинпиң йәнә “хитай земинидин бир сантиметир йәрни айривелишниңму мумкин болмайдиғанлиқи” ни әскәртиш билән биргә: “бизниң хәлқимиз өз дүшмәнлиригә қарши ахирғичә қанлиқ уруш қилиш роһиға игә” дегән ипадиләрни ишләткән.

Б б с агентлиқи хәвиридә, ши җинпиңниң бу сөзини “тәйвән вә хоңкоңдики мустәқиллиқ һәрикәтлиригә берилгән җиддий сигнал” дегән һәм шундақла хитай һөкүмитиниң даим “шинҗаңлиқ бөлгүнчи исламий қораллиқ күчләр билән күрәш қиливатқанлиқини” илгири сүридиғанлиқиниму әскәртип өткән.

Фирансийә агентлиқи бу һәқтики хәвиридә, ши җинпиңниң мурасимда қилған сөзини “дәһшәтлик милләтчилик” түсини алған сөз, дәп тәсвирлигән.

Бирләшмә агентлиқиниң хәвиридә ейтилишичә, сәйшәнбә күни тәйвән ташқи ишлар министирлиқи баянатчиси андру ли баянат берип, хитай һөкүмитиниң тәйвәнниң ишлириға қол тиқишиға йол қоймайдиғанлиқини билдүрүш билән биргә, тәйвәнниң америка билән болған мунасивәтлирини давамлиқ күчәйтидиғанлиқини тәкитлигән.