Xitay re'is shi jinping xitayning bölgünchilikke qarshi “Qanliq urush” qilishqa teyyarliqini bildürgen
2018.03.20
Xitay dölet re'isi shi jinping xitay xelq qurultiyining yépilish murasimida qilghan sözide xitayni bölüshni meqset qilghan herqandaq bir heriketke qarshi “Qanliq urush” qilishqa teyyarliqini bildürgen. Shi jinpingning yuqiridiki bu sözi xelq'ara metbu'atlarning küchlük diqqitini qozghidi.
B b s agéntliqining xewiride éytilishiche, xitay dölet re'isi shi jinping 13-qétimliq xitay xelq wekiller qurultiyining 1- omumiy yighining yépilish murasimidiki nutqida teywen we xongkongni küchlük rewishte agahlandurup: “Döletni birlikke keltürüshni emelge ashurush xitay xelqining birdek arzusi. Uni bölüshke urun'ghan herqandaq bir heriket choqum meghlup bolidu” dégen.
Shi jinping yene “Xitay zéminidin bir santimétir yerni ayriwélishningmu mumkin bolmaydighanliqi” ni eskertish bilen birge: “Bizning xelqimiz öz düshmenlirige qarshi axirghiche qanliq urush qilish rohigha ige” dégen ipadilerni ishletken.
B b s agéntliqi xewiride, shi jinpingning bu sözini “Teywen we xongkongdiki musteqilliq heriketlirige bérilgen jiddiy signal” dégen hem shundaqla xitay hökümitining da'im “Shinjangliq bölgünchi islamiy qoralliq küchler bilen küresh qiliwatqanliqini” ilgiri süridighanliqinimu eskertip ötken.
Firansiye agéntliqi bu heqtiki xewiride, shi jinpingning murasimda qilghan sözini “Dehshetlik milletchilik” tüsini alghan söz, dep teswirligen.
Birleshme agéntliqining xewiride éytilishiche, seyshenbe küni teywen tashqi ishlar ministirliqi bayanatchisi andru li bayanat bérip, xitay hökümitining teywenning ishlirigha qol tiqishigha yol qoymaydighanliqini bildürüsh bilen birge, teywenning amérika bilen bolghan munasiwetlirini dawamliq kücheytidighanliqini tekitligen.