Xitay Uyghur rayonidiki xewer qilinmighan bir qisim qanliq weqelerni qismen ashkarilidi
2016.01.26
Xitayning “Yer shari waqti” géziti qatarliq dölet axbarat wasitiliri ötken hepte xitay qoralliq qisimlirining atalmish térrorluqqa qarshi heriketlirini medhiyelep élan qilghan maqaliside, ötken yili Uyghur rayonida yüz bergen, emma xewer qilinmighan üch qanliq weqeni tilgha alghan.
Xewerde déyilishiche, ötken yilning melum bir küni bir guruh atalmish térrorchilar aqsuda kocha charlawatqan qoralliq saqchi etritige hujum qilghan, hujumda weqe meydanigha bir aptomobilda kelgen hujumchilar saqchi aptomobiligha we etrapigha qara-qoyuq bomba tashlighan. Xewerde déyilishiche, uchturpan nahiyilik qoralliq qisim etriti hujumchilarni qorshawgha élip weqeni bésiqturghan.
Xewerde yene déyilishiche, ötken yilning melum bir küni bir guruh atalmish térrorchilar tün kéchide melum bir saqchixanigha hujum qilghan, bu hujum yüen shyawping isimlik bir etret bashliqining qomandanliqida bir terep qilin'ghan. Xewerde bayan qilinishiche bu weqening bir terep qilinishida saqchilarning orun jehettiki ewzelliki muhim rol oynighan. Xewerde weqening éniq waqti we ornining yoshurulushi, weqede ölgen-yarilan'ghanlar saniningmu tilgha élinmasliqi xelq'ara weziyet közetküchilirining diqqitini tartti.