“Uyghur kishilik hoquq qanun layihesi” amérika dölet mejlisige resmiy sunuldi

Muxbirimiz irade
2018.11.14

Amérika dölet mejlis ezaliri teripidin Uyghur élidiki éghir kishilik hoquq depsendichilikige qarshi turush üchün teyyarlan'ghan “Uyghur kishilik hoquq qanun layihesi - 2018” amérika dölet mejlisige resmiy yosunda sunuldi.

Mezkur qanun layihesi 14-noyabir charshenbe küni, amérika kéngesh palatasining jumhuriyetchiler partiyesidin kélip chiqqan ezasi marko rubiyo we démokratlar partiyesidin kélip chiqqan ezasi bob ménéndaz bashchiliqida tonushturulghan. U, Uyghur élide yüz bériwatqan éghir kishilik hoquq depsendichiliklirini ayaghlashturush, yépiq terbiye lagérlirini taqash we xitay hökümitining amérika puqraliqidiki we yaki amérikida qanunluq turuwatqan Uyghurlargha tehdit sélish heriketlirini tekshürüp, bu heqte tedbir élishni asasiy nishan qilghan.

Kéngesh palata ezasi marko rubiyo bügün bu munasiwet bilen élan qilghan bayanatida, özining bu qanun layihesige bashlamchi bolghanliqidin pexirlinidighanliqini ipadilesh birge, xitay hökümitining Uyghur aptonom rayonida bir milyondin oshuq Uyghur we bashqa musulmanlarni lagérgha qamishida rol oynighan barliq kishilerning choqum jazalinishi kéreklikini tekitligen.

Kéngesh palata ezasi bob ménéndaz bolsa bayanattiki sözide xitay hökümitining Uyghurlargha qiliwatqan mu'amilisini “Tolimu rezil” dep tekitligen we amérika prézidénti donald trampni bu mesilide éniq we da'imiy pozitsiye tutushqa chaqirghan.

Melum bolushiche, mezkur qanun layihesi dölet mejlisidiki her ikki partiye ezalirining ortaq qollishigha érishken. Bügün, 14-noyabir küni yene, amérika awam palatasidimu dölet mejlis ezasi kiristofér simis we tom sozzilar bashchiliqida yuqiridikige oxshap kétidighan bir qanun layihesi birla waqitta tonushturulghan.

“Uyghur kishilik hoquq qanun layihesi” ning resmiy yosunda élan qilinishi chet'ellerdiki Uyghurlarni xursen qildi. Uyghur pa'aliyetchiliri bu qanun layihesini Uyghurlarning milliy dawasi we hayatigha küchlük tesir körsitidighan bir ijabiy bashlinish, dep bahalidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.